फोहोर व्यवस्थापन निजी क्षेत्रयात
येँ (सन्ध्या टाइम्स)/येँ नापं स्वनिगःया हे फोहोरयात कयाः स्थानीय निकायया कर्मचारीं निसें कयाः फोहोर वाइगु लागाया स्थानीय मनूतय्सं तकं थःपिनि माग पूरा याकेगु तःधंगु समाधानया रुपय् छ्यलाः वयाच्वंगु इलय् आः वयाः फोहोर व्यवस्थापनया भाला निजी क्षेत्रयात बीगु अन्तिम चरणय् थ्यंगु दु ।
सरकारया फोहोरमैला स्रोत परिचालन केन्द्र तथा व्यवस्थापनपाखें अथे निजी क्षेत्रयात फोहोरमैला व्यवस्थापन यायेगु भाला बीगु निंतिं माःगु कथंया पीन्यान्हुया सुचं तकं वेब साइटय् तयाः ज्या न्ह्याकूगु दुसा उगु सुचंया आधारय् स्वंगू थासं मनसाय पौ दर्ता यायेधुंकूगु खँ उगु व्यवस्थापनया प्रवन्धक डा. सुमित्रा अमात्यं 'सन्ध्या टाइम्स'यात कनादिल ।
वइगु लछिया दुने उगु ई क्वचाइगु नापं पंगः मवल धाःसा निदँया दुने स्वनिगःया फोहोर निजी क्षेत्रं स्वइगु प्रायः निश्चित जुइ धुंकूगु खँ नं वय्कलं कनादिल। विदेशय् फोहोरमैलापाखें मत पिकायेगु, साः दयेकेगु, ग्याँस पिकायेगु नापं थीथी कथंया ज्या यानाः उपयोग याइगु खँ न्ह्यथनादिसें वय्कलं नेपालय् नं अथे याये फइगु यक्व हे सम्भावना दु धयादिल ।
लुमंकेबहः जू, फोहरमैलाया समस्या न्हियान्हिथं हे अप्वयावःगु दुसा थीथी ख्यलं तकं वहे फोहरयात कयाः राजनीति नं यायेगु याना वयाच्वंगु दु ।
