चेस कासाय् त्याःपिंत सिरपाः
येँ (सन्ध्या टाइम्स)/महाँकाल माविया ग्वसालय् जूगु महाँकाल रनिङ्ग शील्ड कासाय् त्याःपिंत सिरपाः लःल्हात।
वंगु पुस १२ गते निसें स्वन्हुयंकं जूगु कासाय् महाँकाल मा.वि.या हिमाल लामा न्हाप, दीपज्योति आ.मा.वि.या रुपेश जैसवाल लिउ, महाँकालया हे विवेक लामा लियांलिउ लाःगु खः। अथे हे अन्नपूर्णया विजय डंगोल प्यंगूगु, ख्वप्रिङ्ग एकेदमिया राज प्रजापति न्यागूगु, अन्नपूर्णया रोशन पौडेल खुगूगु, ख्वप्रिङ्ग ई एकेदमिया श्रीकृष्ण प्रजापति, न्हय्गूगु, दीपज्योतिया नविन जैसवाल च्यागूगु, प्रशान्त थापा गुंगूगु व अन्नपूर्णया प्रशान्त थापा झिगूगु थासय् लाःगु खः ।
येँ जिल्ला शिक्षा अधिकारी ज्ञानी यादव मूपाहां कथं झाःगु ज्याझ्वलय् कासाया कजि सन मानन्धरं लसकुस यानादीगु खःसा व्यवस्थापन समितिया नायः विपेन्द्र प्रकाश महर्जनं नं नुगःखँ प्वंकादीगु खः। ज्याझ्वः प्रधानाध्यापक विजयावदन श्रेष्ठया सभापतित्वय् जूगु खः ।
