कारोबार कुहां वंसां नेप्से थहां वन
येँ (सन्ध्या टाइम्स)/स्टक एक्सचेन्जय् म्हिगःया शेयर कारोबारं बजाः परिसुचक नेप्से थहां वंसां छन्हुया न्ह्यः कारोबारय् स्वयां दांया कारोबार धाःसा कुहां वंगु दु। बजाः चालेवं कुहां वनेगु शुरु जूगु नेप्से परिसुचक कारोबार जूगु निघौ लिपा नेप्से थहां वंगु खः। वयां छुं ई लिपा हे हाकनं कुहां वःगु नेप्से सामान्या थहां कुहां जुइगु क्रमं निरन्तरता कयाः च्व.गु खःसा बजाः बन्द जुइ न्ह्यः तक हाकनं नं सामान्य अंकं थहां वनाः कारोबार बन्द जूगु खः। लगानीकर्तातय् कथं बजार परिसुचक थहां वंथें दांया कारोबारय् सुधार वया मच्वंगुलिं थुगु सुधारं निरन्तरता काये मफइगु खँ धाःगु दु ।
नेपाल स्टक एक्सचेन्जया कथं म्हिगःया कारोबारं दकवं समुहया परिसुचक थहां वंगु दु। थ्व क्रमय् बजार परिसुचक नेप्से १ दशमलव ६८ अंकं थहां वनाः ५४७ दशमलव ४१ अंकय् थ्यंगु दु। अथे हे सेन्सेटिभ शुन्य दशमलव ४ या सामान्य अंकं व फ्लोट शुन्य दशमलव १२ अंकं थहां वंगु दु ।
स्टक एक्सचेन्जया कथं म्हिगःया कारोबारय् फाइनान्स व वीमा समुह बाहेक मेगु दक्वं समुहया उपसुचक थहां वंगु दु। नेप्सेय् प्रभाव लाकीगु वाणिज्य समुह थ्व कुन्हुया कारोबारं १ दशमलव ८४ अंकं थहां वनाः ५२९ दशमलव शुन्य १ अंकय् थ्यंगु दु। विकास बैंकया उपसुचक ३ दशमलव ७८ अंकं थहां वनाः ५९९ दशमलव ६४ अंकय् थ्यन। छन्हु न्ह्यःया कारोबारं दकलय् अप्वः थहां वंगु जलविद्युत समुह म्हिगः धाःसा दकलय् म्हो शुन्य दशमलव ६८ अंकं जक थहां वनाः ८०४ दशमलव ७३ अंकय् थ्यंगु दु। मेखे अन्य समुहया सुचक दकलय् अप्वः ११ दशमलव ७५ अंकं थहां वन।
उखे छन्हु न्ह्यः कुहां वःगु फाइनान्स समुह म्हिगः नं १ अंकं कुहां वनाः ५४६ दशमलव ३७ अंकय् थ्यंगु दुसा वीमा समुहया सुचक नं २ दशमलव १३ अंकं कुहां वयेवं ५७३ दशमलव २२ अंकय् थ्यंगु दु ।
स्टक एक्सचेन्जय् म्हिगः ख्वीन्यागू कम्पनीया न्हय्छद्वः व च्यासः व चय्गू कित्ता शेयर कारोबारं स्वंगू करोड ग्वीछगू लख व नीनिद्वः तका दांया कारोबार जुल। अथे हे शेयर कारोबार जूगुली नीच्यागू कम्पनीया शेयर भाः थहां वंगु दुसा नीच्यागू कम्पनीया शेयर भाः कुहां वंगु दु। मेगु गुंगू कम्पनीया शेयर भाः थातं लाःगु दु ।
म्हिगःया शेयर कारोबारय् नविल बैंक लिमिटेडं न्हय्गुंगू लख ग्वीस्वद्वः तका दांया कारोबार याःगु दु। सिद्धार्थ बैंकं दकलय् अप्वः कमे याःगु दुसा आईसिएफसी वित्तीय संस्था लिमिटेडं अप्वः द्यापं फःगु दु। नेपाल डेभ. एण्ड इम्प्लो. प्रमो. बैंक लि.या दकलय् अप्वः १७,१४८ कित्ता शेयर न्याये-मी जुल ।
