माओवादी अनमिनया म्याद खुलाः थप यायेगु पक्षय्

एकीकृत नेकपा (माओवादीं) राष्ट्रसंघीय मिसन अनमिनया समयावधि खुलाः थप यायेमाःगु बिचाः प्वंकूगु दु ।

अनमिन प्रमुख करिन ल्यानग्रेननाप बिहीवाः जूगु खँल्हाबंलाय् माओवादी उपाध्यक्ष डा. बाबुराम भट्टराईं न्हापा निसें हे अनमिनया समयावधि खुलाःया निंतिं थप यायेगु यनाच्वंगुलि थुगु पटक नं खुलाः हे थप यायेमाःगु बिचाः प्वंकादीगु खः ।

सरकारं अनमिनया समयावधि प्यलाः थप यायेत राष्ट्रसंघीय सुरक्षा परिषदयय् पौ छ्वयेगु तयारी यानाच्वंगु इलय् माओवादीया थ्व धापू वःगु खः । भट्टराईं सेना समायोजन व शान्ति प्रकृया पूमवंतल्ले अनमिनया उपस्थिति जरुरी जूगु बिचाः नं प्वंकादीगु खः ।

येँया शान्तिनगरय् च्वंगु भट्टराईया छेँय् जूगु खँल्हाबंलाय् समसामयीक राजनीतिक अवस्थाया बारे नं सहलह जूगु खः ।