चीनं राजनीतिक व व्यापारिक स्वापू अप्वयेकीगु
प्रधानमन्त्री माधवकुमार नेपालया छवाः न्यंकया औपचारिक चीन भ्रमणया झ्वलय् बुधवाः निगू देय् देशं मंकाः प्रेस वक्तव्य पिथंनाः चीनं नेपाः नापया राजनीतिक व व्यापारिक स्वापू अभिवृद्धि यायेगु प्रतिवद्धता प्वंकूगु दु ।
चीनं नेपाःनापया भन्सार शुल्क क्वकायेगु, कृषि विशेषज्ञयात तालिम बीगु प्रस्ताव चीनं याःगु दु । चिनियाँ पक्षं नेपाःया जलविद्युत निर्माण, भौतिक पूर्वाधार विकास, स्वास्थ्य, शिक्षा, मानवसंसाधन विकास लगायत थीथी ख्यःलय् आवश्यक ग्वाहालि व सहायता बीगु जूगु दु ।
नेपाःया आर्थिक-सामाजिक विकासया अवस्थाय् लगातार अप्वयाच्वंगु चिनियाँ ग्वाहालि नेपा: व नेपाली जनताया पक्षय् उल्लेखनीय जुइगु नं विज्ञप्ति न्ह्यथंनातःगु दु । विज्ञप्तिइ सन् १९५५य् कूटनीतिक स्वापू कायम लिपाः छिमेकी देय्त नेपाः व चीन दथुइ दिगो मैत्री आधारित विस्तृत ग्वाहालि व साझेदारीया आधारय् द्विपक्षीय स्वापू सुधार अझ सुमधुर व घनिष्ट यायेगु निर्णय जूगु खँ नं न्ह्यथंनातःगु दु ।
नेपाः व चीनया स्वाशासित क्षेत्र तिब्बताया सीमा क्षेत्रय् आपसी लाभया आधारय् अझ तःधंगु व्यापारिक केन्द्र देयेकेगु विषयलय् निगूलिं देय् सहमति जूगु दु ।
नेपालं थःगु भूमि दुने चीन विरोधी गतिविधि पूर्णरुपं दिकेगु प्रतिबद्धता यासें ताइवान व तिब्बत स्वशासित क्षेत्रयात चीनया अभिन्न एवं अविभाज्य अगंया रुपय् मान्यता बीगु नं स्पष्ट याःगु दु ।
वस्वाः न्ह्यः बुधवाः हे प्रधानमन्त्री नेपालं चिनियाँ राष्ट्रपति हु जिन ताओ, चिनियाँ कम्युनिष्ट पार्टी वैदेशिक विभाग प्रमुख वाङ च्या रुइ व चिनियाँ जनकंग्रेसया अध्यक्ष उ पाङ नाप निगू देय्या द्विपक्षीय स्वापू नेपाःया शान्ति प्रकृया आदिया बारे खँल्हाबंला यानादीगु खः ।
