कांग्रेस व एमालें जनपरिचालन याइगु
सत्तारुढ दल नेपाली कांग्रेस व नेकपा (एमालें) शान्ति प्रकृया व संविधान निर्माण पाखें राष्ट्रया ध्यान केन्द्रित यायेत जनतायात आह्वान यायेगु निर्णय याःगु दु ।
बुधवाः नेपाली कांग्रेस संसदीय दलया ज्याकूथी जूगु कांग्रेस व एमाले वार्ता पुचःया बैठकं शान्ति प्रकृयायात तार्किक निष्कर्षय् थ्यंका निर्धारित इलय् हे संविधान च्वयेत जनपरिचालन यायेगु निर्णय याःगु खः ।
माओवादी लडाकूतय् समायोजन व ल्वाभः व्यवस्थापन मजूतल्ले संविधान च्वयेगु संभव मजूगु निष्कर्ष नं बैठकं पिकाःगु दु । माओवादीं सेना समायोजन यायेगु ज्याय् ग्वाहालि मयाःगु बारे बैठकय् सहलह जूगु खः । नापं बैठकय् माओवादीं घोषणा याःगु गणराज्यया बारे नं सहलह या:गु खः । सहलह लिपाः बैठकं गणराज्य घोषणा यायेगु ज्यां संविधानसभायात औचित्यहीन देयेकूगु धासें उगु ज्या गलत जूगु निष्कर्ष पिकाःगु खः ।
अथेहे बैठकय् देय्या भावी शासन प्रणाली, राज्य पुनर्संरचना गुकथं यायेगु बारे नं सहलह जूगु व उकीयात छगू निश्चित प्रकृया पाखें समाधान यायेमाःगु खँय् निगू दलया नेतात सहमत जूगु खः ।
