थौं गुरुङतय् तमु ल्होछार
नेपाःया छगू मू आदिवासी जनजाति गुरुङ जातिं थौं थीथी ज्याझ्वः यानाः तमु ल्होछार न्यायेकूगु दु । गुरुङंतय्सं पुस १५ निसें न्हि ताःहाक जुइगु, सूद्य पृथ्वीया दक्षिणध्रुवं उत्तर पाखे वनीगु विश्वास सहित थःपिनिगु न्हू दँ कथं हनेगु याः ।
ल्होछाया लसताय् येँ लगायत देय्या थीथी थासय् ज्याझ्वः याःगु दु । येँ दुपिं गुरुङतय्सं छगू याली पिथना लिपाः तिंख्यलय् वनाः छगू ज्याझ्वः याःगु खः । उगु इलय् आधुनिक व परम्परागत कासा, दोहोरी म्येँ हाला, प्याखँ हुयाः ल्होछार न्यायेकूगु खः ।
थ्वहे लसताय् राष्ट्रपति डा. रामवरण यादवं छगू प्रेस विज्ञप्ति पिथना ल्होछारया भिंतुना बियादीगु दु । वयेकलं देय् दुने व देय् पिनेया दक्वं गुरुङ दाजु, किजा, तात, केँय्पिंत सुख, शान्ति व समृद्धिया कामना यानादीगु दु ।
अथेहे ल्होछारया लसताय् कांग्रेस सभापति गिरिजाप्रसाद कोइराला, नेकपा (एमाले)या अध्यक्ष झलनाथ खनाल लगायतं नं ल्होछारया लसताय् भिंतुना बियादीगु दु ।
सरकारं गुरुङ जातिया तमु ल्होछारयात राष्ट्रिय पर्वया कथं कयाः थौं सार्वजनिक बिदा ब्यूगु दु ।
