'राज्यं स्वयां विद्रोही पक्ष पाखें अप्व मानव अधिकार हनन्'
रक्षामन्त्र विद्यादेवी भण्डारीं युद्धया इलय् राज्यं स्वयां अप्वः विद्रोही पक्षं मानव अधिकार हनन्या ज्या याःगु खँ धयादीगु दु ।
एफ्रो-एशियाली जनएकता सम्मेलनया बुधवाः येँय् उल्लेज्या यानादिसें वयेकलं युद्ध अपराध जूगु घटनाय् सुयातं छुट मदइगु धयादिसें सेनाया अनुसन्धानं निर्दोष क्यंगु विषयलय् पुनः कारवही जुइमफइगु धयादिल । वयेकलं धयादिल, - 'थुकथं स्वयेगु खःसा रज्यं स्वयां विद्रोही पक्ष अप्व मानव अधिकार हनन् याःगु दु ।'
वयेकलं ज्याझ्वलय् मानव अधिकार उल्लंघन प्रकरणय् लानाच्वंम्ह रथी तोरण जंगबहादुर सिंहया बढुवा व राष्ट्रसंघं लितः छ्वःम्ह काभ्रेया मैना सुनार हत्याया अभियुक्त सेनानी निरन्जन बस्नेतयात नागरिक अदालत मछ्वःगुया बचाउ यानादिल ।
वयेकलं राष्ट्र संघं शान्ति मिसनय् खटे जुयाच्वंम्ह सैनिक अधिकृतयात लितछ्वयेगु धइगु गम्भीर विषय जूगु धयादिल । अथेहे वयेकलं कानुनयात ल्हातय् कायेगु ज्या अप्वःगुलिं सुरक्षा निकाय सक्षम जूगु सन्देश बीत नेपाली सेनाया सुढृढिकण आवश्यक जूगु खँ नं धयादिल ।
