नेपा: व चिनियाँ प्रधानमन्त्री दथुइ खँल्हाबंला
निगू बुँदे समझदारीपत्रय् हस्ताक्षर
चीन भ्रमणय् दिम्ह प्रधानमन्त्री माधवकुमार नेपाल व चिनियाँ समकक्षी वेन जियाबाओ दथुइ निगू देय्या स्वापूयात अझ बांलाकेत उच्चस्तरीय बृहत व सहकारी सम्झौता यायेगु सहमति जूगु दु ।
वयेकपिं दथुइ बेइजिङया ग्रेट हल अफ द पिपुलय् मंगलवाः बहनी खँल्हाबंलाय् जूगु ख: । अथेहे निम्ह प्रधानमन्त्रीया उपस्थितिइ निगू बुँदे समझदारीपत्रय् नं हस्ताक्षर जूगु दु । सम्झौताय् झिंन्यागू करोड युयानया आर्थिक व प्राविधिक ग्वाहालि व युथ एक्स्चेन्ज ज्याझ्वः दु । सम्झौतायात नेपाःया पाखें परराष्ट्रमन्त्री सुजाता कोइराला व चिनियाँ सरकारया पाखें विदेशमन्त्री याङ जेइची व युथ एक्सचेन्ज सम्बन्धी सम्झौता उद्योगमन्त्री चेन डेमिङं हस्ताक्षर यानादीगु खः ।
अथेहे छघौ ताःहाकःगु खँल्हांलायाय् चिनियाँ प्रधानमन्त्री जियाबाओं न्यय्प्यदँ न्ह्यः निसें शुरु जूगु नेपाः व चीन दथुइया दुइपक्षीय कुनिटिक स्वापू थौं तकया दुने निगू देय् बांलागु छिमेकी राष्ट्र, पासाः व सहयोगी जूगु धयादिल ।
नापं जियाबाओं नेपाःया विकासय् ग्वाहालि यायेत चीनया प्रतिबद्धता कथं अनुदान व स्फ्टलोन अप्वयेकाःगु धयादिल । वयेकलं नेपालय् लगानी अप्वयेगु नीति कथं हे पश्चिम सेती परियोजनाय नं लगानी अप्वयेकूगु धयादिल ।
चिनियाँ प्रधानमन्त्रीं नेपाःया शान्ति व संविधान निर्माण प्रकृयायात निष्कर्षय् याकनं थ्यंकेत इनाप यानादिल । अथेहे नेपालं नालाकाःगु छगू चीन नीति प्रति सुभाय् देछानादिल ।
प्रधानमन्त्री नेपालं चीनं नेपाःयात आः तक यानावयाच्वंगु ग्वाहालिया प्रसंशा यानादिसें थुकीया अर्थ चीन व नेपाःया स्वापू छगू न्हूगु उँचाइलय् थ्यनेत्यंगु धयादिल । वयेकलं नेपा: व चीन दथुइया सहकार्य पाखें निगू देय्या स्वापूयात अझ क्वतुकेगु धयादिल ।
अथेहे वयेकलं नेपाः न्ह्यावलें नं छगू चीन नीतिया पक्षय् दुगु धयादिसें नेपालय् चीन विरोधी गतिविधि जुइमबीगु आश्वासन बियादिल ।
प्रधानमन्त्री नेपालं बुधवाः चिनियाँ राष्ट्रपति हु जिन तावयात नापलायेगु ज्याझ्वः दु ।
(किपा: - सिन्ह्वा)
