प्यलाःया दुने माओवादी लडाकू समायोजन : शान्तिमन्त्री
शान्तिमन्त्री रकम चेम्जोङं माओवादी लाडकूया समायोजन व पुनःस्थापना प्यलाःया दुने क्वचायेगु ताःतयाः सरकारं अन्मिनया म्याद प्यलाःया निंतिं थप यायेत्यंगु खँ धयादीगु दु । वयेकलं जेठ १४ गते न्ह्यः हे लडाकूया समायोजन व पुनःस्थापना यायेत अन्तिम पटक अन्मिनया म्याद थप यायेत्यंगु धयादिल ।
मंगलवाः नेपालगञ्जय् प्रेस चौतारीं ग्वसाःग्वःगु पत्रकार सम्मेलनय् न्ववानादिसें वयेकलं सरकार, माओवादी व राष्ट्रसंघ दथुइ अयोग्य लडाकू चीकेत माओवादी अध्यक्ष पुष्पकमल दाहाल 'प्रचण्ड' व राष्ट्रसंघीय प्रतिनिधी राधिका कुमारास्वामी साक्षी तयाः जूगु सम्झौता सफल जुइगु विश्वास प्वंकादिल । वयेकलं अयोग्य ठहर जूपिं लडाकूयात कम्ब्याट वसःया पलेसाः नागरिक वसः, परिचयपौ व लँ खर्च बियाः विदाइ याइगु धयादिल ।
न्हूगु संविधान लिपाः नं राजनीतिक दलया सेना व अर्धसैनिक संरचना दयाच्वंसाः शान्ति प्रकृयां पूर्णता मकाइगु धयादिसें शान्तिमन्त्री चेम्जोङं सरकार याकन स्वयाः याकन लडाकू समायोजन व पुनःस्थापना यायेगु पक्षय् दुगु धयादिल ।
