राजदूततय् नं थःगु हे दुःख
येँ (सन्ध्या टाइम्स)/थौंकन्हय् गोष्ठी, सेमिनार आदि थीथी त्वहचिनाः युरोप भ्रमणय् वइपिं नेपाःया मन्त्री व सभासद्तय्सं अन च्वंगु नेपाली राजदूतावासय् गाडी व गाँसबासया माग यानाः दिक्क हे यानाच्वंगु खँ सम्बद्ध राजदूततय्सं धाःगु दु ।
प्रधानमन्त्री माधव नेपाल उकुन्हु कोपनहेगन झाःबलय् अन वयाच्वंपिं युरोपया थीथी देशय् च्वंपिं राजदूततय्सं प्रमयात नापलासें थुकिं यानाः थःपिंत तसकं समस्या जुल धकाः गुनासो प्वंकूगु खः ।
सम्बद्ध राजदूतय्सं धाः कथं नेपालं वइपिं मन्त्री व सभासद्त थःगु हे देशय् भ्रमण भत्ता कयाः वयेधुंकी तर युरोप थ्यन कि भत्ता खर्च यायेगु पलेसा नेपाःया राजदूतावासय् वयाः नयेगु, त्वनेगु, द्यनेगु व चाःहिलेगु व्यवस्था यायेमाल धकाः कचकच याः वयाच्वनी। अले उमित चाःहिलेत व शपिङ्ग यायेगु लागिं दूतावासया गाडी व कर्मचारी खटे याये मालाच्वनी। छुं जुयाः उमिसं धाःगु माने मजुल कि सरकार क्वःथला बी ला? छिमित थनं नेपाः सःता बी ला? धकाः ख्याच्वः बीगु खँ नं उमिसं धाःगु दु। अझ गुलिसिनं ला लिहां वने त्ययेकाः जहाजया टिकट तकं न्याना बिउ धकाः राजदूतयात दुःख बीगु याइ। थुकिं यानाः राजदूतत मेगु ज्या यायेगु त्वःताः नं मन्त्री व सभासद्या खातिरदारीइ लगे जुइ मालाच्वंगु दुःख उमिसं प्वंकूगु दु ।
