फोहोर वायेगु ज्याय् हानं पंगः

येँ (सन्ध्या टाइम्स)/स्थानीय निकायया कर्मचारीतय्सं आन्दोलन यानाः ब्वलंगु फोहोरया समस्या आः ला समाधान जुइ धकाः महानगरवासी नापं स्वनिगःवासीतय्सं आशा यानाच्वंगु इलय् हाकनं मेगु हे समस्या ब्वलंगु दु ।

फोहोर तयेयंकेगु थाय् आलेटारय् वनेगु लँय् लाःगु सातोमाटेया स्थानीयवासीतय्सं थनिंनिसें ताँ व लँ दयेका बी माःगु माग यासें फोहोरया गाडीयात पना बिउगु दु। स्थानीय मनूतय्सं फोहोर मुंका यंकूगु झिगः गाडी अन हे थाकातःगु दु। कर्मचारीतय्सं वंगु पुस ५ गतेनिसें याःगु आन्दोलनं फोहोर मुनेगु ज्या तकं ठप्प जुयाच्वंगु खःसा सरकारलिसे सहमति जुइवं म्हिगःनिसें फोहोर ब्यवस्थापन यायेगु धाःगु खः तर थनिंनिसें हे हाकनं पंगः ब्वलंगु दु। उकिं फोहोर ब्यवस्थापनय् वंगु झिन्हु न्ह्यःनिसें हे समस्या ब्वलनाच्वंगु कारणं येँ नापं स्वनिगःया थाय्थासय् मुनाच्वंगु फोहोर उठे यायेगु ज्या हानं दिउगु दु। थौंकन्हय् येँय् ३,००० टन फोहोर मुनाच्वंगु दु ।