नेप्से हाकनं सामान्य अंकं च्वय्
येँ (सन्ध्या टाइम्स)/छन्हु न्ह्यःया कारोबारं सामान्य कुहां वंगु नेप्से परिसुचक म्हिगःया शेयर कारोबारं हाकनं छुं भचा सुधार जुयाः सामान्य अंकं हे थहां वंग दु। यद्यपि शेयर बजारय् लगानीतय् कथं परिसुचक थहां वंसा दांया कारोबारय् सुधार वये मफयाच्वंगुलिं थुगु सुधारं निरन्तरता काये मफइगु खँ धाःगु दु। छन्हु न्ह्यः थें हे बजाः चालेवं नेप्से थहां कुहां जूगु खः ।
घौछि लिपा नेप्से परिसुचक ३ अंकं तक निक्वः थहां वनेधुंकूगु खःसां थहां कुहां जुइगु क्रमं निरन्तरता कायेवं अन्ततः नेप्से थहां वनेगु झ्वलय् शुन्य दशमलव ४६ अंकं थहां वनाः ५४५ दशमलव ७३ अंकय् थ्यंगु दु। छन्हु न्ह्यः थहां वंगु सेन्सेटिभ म्हिगः नं शुन् दशमलव शुन्य ९ अंकं थहां वंगु दुसा फ्लोट नं शुन्य दशमलव शुन्य ५ अंकं थहां वन ।
नेपाल स्टक एक्सचेन्जया कथं कारोबार जूगु उपसुचकय् फाइनान्स समुह छगू बाहेक मेगु दक्वं समुहया उपसुचक थहां वनेवं थुकिया प्रभाव नेप्सेय् लाःगु खः। थ्व कुन्हु वाणिज्य समुह १ दशमलव ३४ अंकं थहां वनाः ५२७ दशमलव १७ अंकय् थ्यंगु दु। विकास बैंक समुह शुन्य दशमलव ७८ अंकं थहां वनाः ५९५ दशमलव ८६ अंकय् थ्यंगु दु। अथे हे जलविद्युत समुह दकलय् अप्वः ३ दशमलव शुन्य ३ अंकं थहां वनाः ८०४ दशमलव शुन्य ५ अंकय् थ्यन।
उखे छन्हु न्ह्यःया कारोबारय् कुहां वःगु वीमा समुहया सुचक १ दशमलव शुन्य ६ अंकं थहां वनाः ५७५ दशमलव ३५ अंकय् थ्यंगु दुसा छन्हु न्ह्यःया कारोबारय् दकलय् अप्वः कुहां वःगु फाइनान्स समुह म्हिगः नं ३ दशमलव ८१ अंकं कुहां वनाः ५४७ दशमलव ३७ अंकय् थ्यंगु दु। मेखे अन्य समुहया सुचक धाःसा थातं लाःगु दु ।
स्टक एक्सचेन्जय् ख्वीखुगू कम्पनीया मुक्कं झिंछसः व खुगू कारोबारं ग्वीप्यद्वः व गुसः व नीछगू कित्ता शेयर न्याये-मी जुयाः प्यंगू करोड न्हय्खगू लख व पीन्हय्द्वः तका दांया कारोबार जूगु दु। कारोबार कम्पनी मध्ये नं नीप्यंगू कम्पनीया शेयर भाः थहां वःगु दुसा नीन्यागू कम्पनीया शेयर भाः कुहां वल। मेगु न्हय्गू कम्पनीया शेयर भाः धाःसा यथावत हे जुल ।
म्हिगःया शेयर कारोबारय् लुम्बिनी बैंक फाइनान्सया १११/-, नवदुर्गा फाइनान्सया २२१/-, नारायणी नेशनल फाइनान्सया ५८/ व दकलय् अप्वः सिद्धार्थ बैंक शेयरय् २५५/- तका प्रति कित्ताय् दां कुहां वल। उखे वाणिज्य समुहया प्रमुख बैंक नविल बैंकया ४२/- व ललितपु फाइनान्सया शेयरय् ५५ /- तका प्रति कित्ताशय् दां थहां वंगु दु ।
स्टायण्डर्ड चार्टर्ड बैंकं दांया ल्याखं न्यय्न्यागू लख झिंगुद्वः तका दांया कारोबार याःगु दु। सम्झना फाइनान्स लिमिटेडं दकलय् अप्वः कमे याःगु दुसा नवदुर्गा फाइनान्स लिमिटेडं अप्वः द्यापं फःगु दु ।
