बधाई ! सुभाय् ! हाइ हाइ !

नर्मदेश्वर प्रधान

उखुन्हु। कमरेड प्रचण्डया न्वचु वानेश्वरय्। तसकं प्रचण्ड। जिं न्यना। प्रचण्ड वक्ता जूगुलिं हे वय्कःया नां प्रचण्ड जूगु हं। वय्कलं न्वचुइ धाइ, "नोकरत लिसे संवाद जुइ मखु। आः इमि मालिक लिसे खँ जुइ। दिल्लीलिसे तप्यंक सम्पर्कय् वने। वार्ता याये।" राजनीतिक वृतय् प्रचण्डया थ्व खं तःधंगु तरंग हइ। कन्हय् कुन्हु। तर व अभिव्यक्तिं मोड काइ। थ्व मात्र राजनैतिक व्यङ्ग खः। धापू यथार्थ मखु। कमरेड प्रचण्डं स्पष्ट याइ ।

थौं खबरय् वइ। मन्त्रीमण्डलया छगू निर्णय। शान्ति नोवेल पुरस्कारया निंतिं सिफारिस भाजु गिरिजाप्रसाद कोइरालायात। मतिइ तये। प्रम माधवकुमारया गज्याःगु सदासयता! गिरिजा प्रति। अहो! धन्य! तर अनसं शंका लुइ। मखु, थ्व खँय् विश्वास याये ला कि मयाये? दोमन जुइ। थ्व मात्र राजनैतिक व्यङ्ग खः कि? कन्हय् माधवजुया स्पष्टीकरण वइगु खः ला? छु ठेगान। व्यङ्ग। मजाक। ख्याः। मनोरञ्जन। देशया राजनीतिइ हावी जुयाच्वंगु दु थौं। थौं छता खँ। कन्हय् मेता। निर्धक्क। निश्चिन्त। अझ। निर्लज्ज कथं नं। नेतातय्सं थुज्वःगु खँय् लज्जावोध, अपराधवोध यायेम्वाः। कारण इमिसं धाइ, थ्व खेल। इमिगु रणनीति खः। सिद्धान्त मखु। राजनीतिइ रणनीति न्ह्यागु नं जुइफु। न्ह्याकथं नं म्हितेफु। अंगे्रजीया प्रसिद्ध निवन्धकार बेकनं थज्याःगु दक्षतायात व्यवहारिक बुद्धिमानी धाइ। च्वछाइ।
गिरिजाप्रसादयात नोवेल पुरस्कारया सिफारिस। बुखँ न्यने। पलख अलमलय् जुइ। न्ह्यलय् ला ज्वलय् ला? तिफ्याये फइ मखु। छु न्यनाच्वना जिं। धात्थें ला? वा म्हगसय्? थःत छकः कुतिं न्याये। आया! झसंग जुइ। ज्वलय् हे खनिं। पक्का जुइ। थौं गुंपुन्हि ला! ख्यालः दिवस? झुमिं यं थें जुइ। थ्व बुखँ व्यङ्गध्याचू ला मखुला गुंपुन्हिया? न्हिले। मजाक याये। पलख लिपा थःगु न्हिलां हे थःत म्वाय् चुइकी। गनया गुंपुन्हिं थौं? थौं ला क्रिसमस। क्रिश्चियनतय् महान नःखः। थ्व शुभ-न्हि। नोवेल पुरस्कारया सिफारिस। माधव कुमारया गिरिजायात क्रिसमसया उपहार जुइमाः। गिरिजायात थौंया न्हि। भिंतूगु जुइमाः। सुभाय् ।

गुलिसिनं धाइ, माधवकुमार नेपालया छ्यों फुसय् गिरिजा "डेमोकल्स"या तरवार जुयाबी। न्ह्याबलें खतरा। गिरिजां "हाउ" याइ। माधव थारान्हुइ। माधवया संकट वोध। गिरिजां अधिकतम फाइदा कायेत स्वइ। महत्वाकांक्षा पूवंकेत स्वइ। सौदावाजी याइ। म्ह्याय् सुजातायात उपप्रधानमन्त्री याकी। सौदावाजीया खेल क्वचाइ मखु। म्ह्याय् प्रधानमन्त्री जूगु स्वयेमानि। प्राण त्वःते न्ह्यः। गिरिजाया ढिपी। अवचेतन मनया इच्छा। पूवंके मानि। गिरिजा दृढ। सुजातायात प्रधानमन्त्री याये। थुकिया लागिं सुयात ख्यायेमाः। सुयात ह्ययेकेमाः। ख्यायेगु-ह्ययेकेगु गणितय् गिरिजा व्यस्त जुइ। मस्त जुइ। नेपाःया राजनीतिया चेस बोर्ड न्ह्यःने तइ। गिरिजां गोटी चाले याइ ।

माधवजीं सुजातायात उप प्रधानमन्त्री पद बी। गिरिजाया आंशिक इच्छा पूवनी। पूवंकेगु इच्छा ल्यं दनि। सुजाता प्रधानमन्त्री हे जुइमाः। अबुया आग्रह यथावत। तर माधवकुमारया सीमा दु। वं सुजातायात प्रधानमन्त्री याये फइ मखु। थुकिया लागि थःगु कुर्सि त्वःतेमाः वं। थ्व संभव जुइ मखु। गिरिजाया जक मखु। राजनीतिइ महत्वाकांक्षा सकसियां दइ। माधव नेपाल नं सन्त मखु। साधु मखु। द्यः मखु। कुर्सि मोह वयाके नं दइ। माधवजीयाके भय दइ। प्रधानमन्त्री पदया प्रलोभन क्यनी। सुजातायात सुना नं फँसे याइ। ह्ययेकाः यंकी। पुइका काइ। राजनीति खः। थन न्ह्यागु नं जुइफु। न्ह्यागु नं संभव। माधवजी सतर्क जुइ ।

गिरिजायात मुडय् तयेमाः। ठामठुम यायेमाः। लय्ताय्केमाः। माधवं बिचाः याइ। अन्तर्राष्ट्रिय ख्यातिया आकर्षण। शान्ति नोवेल पुरस्कार। ललिपप। माधवं गिरिजायात ज्वंकेत स्वइ। ह्ययेकेत स्वइ। गुलिसिनं मजाक याइ। खाइक टिप्पणी नं याइ। "थ्व छुं मखु। माधव नेपालया चाकडी खः। मात्र खुसामत। गिरिजाप्रसादयात ।"

सुथ पाखेर। अखबार पसलय् वने। थौंया मू बुखँ। वहे नोवेल पुरस्कारया सिफारिस। व्यापक चर्चाय् वइ। बुखँ स्वइ। ब्वनी। गुलिं न्हिली। गुलिसिनं असन्तोष व्यक्त याइ। "विश्वय् मेपिं सुं हे मन्त जुइ। उकिं हे गिरिजायात नोवेल शान्ति पुरस्कारया सिफारिस याःगु जुइ।" कटाक्ष याइ। नोवेल पुरस्कारदातातय्सं नोवेल पुरस्कार बीम्ह व्यक्ति लुइके फत जुइ। उकिं नेपाल सरकारयात अनुरोध याःगु जुइमाः।" उपहास याइ। गम्भीर जुयाः छम्हसिनं धाइ। गिरिजायात नोवेल पुरस्कारया सिफारिस। थ्व सिफारिस याःम्ह माधवकुमार नेपाल हे पुरस्कारया निंतिं योग्य जुइ। शान्तिप्रतिया चेतना व शुक्ष्म पहिचान। वय्कःयागु दक्षता। असाधारण खनिं ।

पञ्चायतकालया छगू घटना लुमनी। छम्ह विद्वानं दः कंगु। वय्कः विद्वानयात प्रज्ञा प्रतिष्ठानया सदस्य जुइ मास्तेवल। वय्कः पहुँच दुम्ह उबलय्या शक्तिशाली मनूयाथाय् वनी। थःगु इच्छा कनी। शक्तिशाली महाशयं लिसः बी - "ठीक जू। सिफारिस समिति गठन जूगु दु। अनं सिफारिस जूसा छिगु जुइ। ढुक्क जुयादिसँ।" विद्वान उत्साहित जुइ। शक्तिशाली मनूया वचन। पत्याः याइ। सिफारिस मण्डलया मनूत लिसे सम्पर्कय् वइ। इमिसं नं विश्वास बी। सिफारिसय् विद्वानया नां वनी। दुर्भाग्य। अन्तिम लिष्टय् वयागु नां दइ मखु। विद्वान भाजु जिल्ल जुइ। शक्तिशाली मनूयाथाय् वनी। थःगु नां मवःगु खँ कनी। शक्तिशाली मनू लयताइ। दंग जुइ ।

विद्वानयात बधाई बी। धाइ, "सिफारिसय् छिगु नां दुथ्यात। ओहो! वहे छिगु विद्वताया तःधंगु कदर खः। छिं थ्व खँय् गर्व तायेके माः। थुकी दुःख तायेम्वाः। सिफारिस जूगुया निंतिं बधाई!" खँ न्यनी। विद्वानया विद्वता नाया वनी। लः लः जुइ। ख्वये ला न्हिले ला जुइ ।

छख्यर देशय् अशान्ति, असुरक्षा प्यख्यरं कोलाहल। अस्तव्यस्त ।

बेठेगान। बन्द। हडताल। मेख्यर नोवेल पुरस्कारया निंति गिरिजायात सिफारिस। उखान लुमनी - "नौचिया ज्या मंत कि खिचाया प्यनय् सँ खाः जुइ।" प्रम माधवया मेगु छुं ज्या मन्त ला? शान्ति पुरस्कारया सिफारिस याः जुइ ।

शान्ति पुरस्कार गबलय् कुतुं वइ। व ला इलं धाइ। सिफारिस जूगु निंतिंसां गिरिजायात बधाई! सुभाय्! हाइ हाइ !

narapradhan@yahoo.com

More Stories Like this