नेपाःया आर्थिक विकासय् ग्वाहालि यायेत प्रमया इनाप
छवाः ताःहाकःगु चीन भ्रमणया झ्वलय् प्रधानमन्त्री माधवकुमार नेपालं चीनय् ज्या यानाच्वंपिं व ब्वनाच्वंगु विद्यार्थीतय्त नेपाःया आर्थिक विकासय् ग्वाहालि यायेत इनाप यानादीगु दु ।
चीनया सान्सी प्रान्तया राजधानी सिआनं सोमवाः बेइजीङ थ्यंकादीम्ह प्रधानमन्त्री नेपालया सम्मानय् चीन स्थित नेपाली राजदुतावसं याःगु बेलीभ्वय्लय् न्ववानादिसें वयेकलं नेपालं न्यालाःया दुने संविधान च्वये धुंकाः राजनीतिक अवस्था स्थीर जुइगु व न्हूगु तरिकां नेपाःया आर्थिक विकास जुइगु धयादिल ।
चीनय् व्यापार यानाच्वंपिं व अध्यन यानाच्वंपिं विद्यार्थीतय सहभागिता दुगु ज्याझ्वलय् वयेकलं देशय् पिने च्वनाच्वंपिं नेपाःमितयेके नेपाः प्रति ग्वाहालि यायेगु भावन दुगु व उकीया उच्च सम्मान यानागु धयादिसें नेपाःलय् यातायात, जलविद्युत आदि थीथी थासय् लगानी यायेत तःधंगु अवसर दुगुलिं थुगु क्षेत्रय् लगानी यायेत पिने च्वनाच्वंपिं नेपाःमितय्त इनाप यानादिल ।
अथेहे वयेकलं नेपाःया न्ह्यागू सरकार वसां एक चीन नीति प्रति समर्थन यानाच्वंगु व यानाच्वनीगु विश्वास प्वंकादिसें नेपाःया भूभाग छ्यलाः तिब्बत व चीन विरोधी गतिविधि जुइमबीगु धयादिल । वयेकलं नेपालं न्ह्यावलें तिब्बतयात चीनया हे छगू अभिन्न अंगया कथं कयाःगु नं धयादिल ।
ज्याझ्वलय् प्रधानमन्त्री नेपाल नापं उपप्रधानमन्त्री सुजाता कोइराला, चीनया निंतिं नेपाली राजदुत टंक कार्की, प्रथम सचिव राजाराम बर्तौला, व्यापारी, विद्यार्थी नापं चिनियाँ बुद्धिजिवि व व्यापारीतय् नं ब्वति दुगु खः ।
