'छगू मधेश वा छगू थारु प्रदेश असम्भव्'
एकीकृत नेकपा (माओवादी)या भातृ संगठन थारुवान मुक्ति मोर्चाया अध्यक्ष रामचन्द्र चौधरीं मधेशीतय्सं धाः कथं समग्र मधेश वा थारुतय्सं धाः कथं समग्र तराई छगू थारु प्रदेश निगूलिं जुइमफइगु खँ धयादीगु दु ।
मंगलवाः विराटनगरय् न्ह्याःगु कोचिला राज्य समिति अर्न्तगतया थारुवान मुत्ति मोर्चाया अगुवा कार्यकर्तात नापया आन्तरिक प्रशिक्षणय् ब्वति काये न्ह्यः पत्रकारत नाप खँल्हाबंला यानादिसें चौधरीं माओवादीं निधारण याःगु कथं थारु प्रदेश जुइगु व थारु नेता लक्ष्मण थारु वा थारु कल्याणकारी सभां धाः थें समग्र तराई छगू थारु प्रदेश जुइमफइगु धयादिल ।
भाषिक, जातीय व क्षेत्रीय अधिकार दक्वं जातजाति व भाषाभाषीतय्त उतिकं हे दुगु खँ न्ह्यथंनादिसें चौधरीं समग्र प्रदेशया खँ अवैज्ञानिक व आधारहीन जूगु दाबी यानादिल । माओवादीं घोषणा याःगु थारुवान गणराजयया प्रमुख समेत जुयादीम्ह चौधरीं घोषणा याःगु स्वायत्त गणराज्यय् हे च्वनाच्वंपिं स्थानिय बासिन्दातय्त स्वायत्तता बीगु उपयुक्त जुगु कनादिल ।
