न्हूगु जहाज न्यायेगु प्रक्रिया रद्द
सार्वजनिक लेखा समितिं नेपाल वायुसेवा निगमया जहाज न्यायेगु प्रक्रिया सार्वजनिक खरिद ऐन विपरित जूगुलिं रद्द यायेत सोमवाः सरकारयात निर्देशन ब्यूगु दु । समितिं एयरबसयात ५ करोड ७३ लख तका ध्यबा बैना मुंकेगु झ्वलय् अख्तियार दुरुपयोग जूगु ठहर यासें समितिं कानुन बमोजिम कारवाही यायेत नं सरकारयात निर्देशन ब्यूगु दु ।
निगम व्यवस्थापन संचालक समिति, अर्थ मन्त्रालय, पर्यटन मन्त्रालय, कर्मचारी सञ्चयकोष, सार्वजनिक खरिद अनुगमन ज्याकू, महालेखा परीक्षकया ज्याकू, कानुन व्यवसायी, हवाई विज्ञ लगायत नाप तःक्वः हे सहलह यायेधुंकाः समितिं सरकारयात थ्व प्रकृया रद्द यायेत निर्देशन ब्यूगु खः ।
अथेहे समितिं आवश्यकता व क्षमता कथं न्हू जहाज अविलम्ब न्यायेत अर्थ मन्त्रालययात निर्देशन ब्यूगु दु । निगमयात जहाज न्यायेत आवश्यक ध्यबा जमानी च्वनेगु निकाय अर्थ मन्त्रालय जूगुलिं लेखा समितिं थंज्याःगु निर्देशन अर्थ मन्त्रालययात ब्यूगु खः ।
समितिं जहाज न्यायेगु निर्णययात अन्तिम रुप बी न्ह्यः निगम व्यवस्थापनय् ल्यंदनीगु विवाद क्वचायेकेत, न्हूगु जहाज न्ययेगु इलय् आर्थिक व व्यापारिक पक्षया दक्वं विश्लेषण यायेत व जहाज न्यायेगु प्रकृयाय् दक्वं कानुन व नियम बमोजिम दइगु सुनिश्चितता प्रदान यायेत अर्थ मन्त्रालययात निर्देशन ब्यूगु खः ।
