चिकित्सकतय् माग सम्बोधन यायेत कार्यदल गठन
चिकित्सकतय् मागया बारे अध्ययन यानाः सरकारयात सिफारिस यायेत स्वास्थ्य मन्त्री उमाकान्त चौधरीया संयोजकत्वय् उच्चस्तरीय न्याम्ह दुजः दुगु कार्यदल गठन याःगु दु । कार्यदलय् अर्थमन्त्री सुरेन्द्र पाण्डे, सामान्य प्रशासन मन्त्री रवीन्द्र श्रेष्ठ, कानुन मन्त्री प्रेमबहादुर सिंह व सदस्य सचिवया कथं स्वास्थ्य सचिव सुधा शर्मा दु ।
सोमवाः न्हिनय् च्वंगु मन्त्रिपरिषदया आकस्मिक बैठकं चिकित्सकतय्त आन्दोलन लित कायेत आह्वान यासें उगु निर्णय याःगु खः । कार्यदलं चिकित्सकतय् मागया सम्बन्धय् नियमावली लगायतया विषयत अध्ययन यानाः सरकारयात सिफारिस याइ । अथेहे चिकित्सकतय् नियुक्ति गुंगूगु तह पाखें जुइगु निर्णय नं सरकारं याःगु दु ।
थ्वस्वयां न्ह्यः सोमवाः सुथय् निसें स्वास्थ्यकर्मी व स्वास्थ्य सुरक्षा सम्बन्धय् व्यवस्था यायेत देयेकूगु ऐन कार्यान्वयन यायेमाःगु माग यासें नेपाल चिकित्सक संघं आन्दोलन न्ह्याकूगु खः ।
