नेवाः विरोधीपाखें रंगशालाय् बबाल
येँ (सन्ध्या टाइम्स)/दशरथ रंगशालाय् जूगु नेवाः स्वायत्त राज्य घोषणा ज्याझ्वःपाखें नुगः मूपिं कासाख्यःया मनूतय्सं म्हिगः खेलकुद परिषद्या ज्याकुथी तोडफोड याःगु दु। नेवाः स्वायत्त राज्य घोषणाया लागिं परिषदं थाय् उपलब्ध याना बिउगु खःसां ज्याझ्वः सिधयेकाः अन सफा यायेगु जिम्मा येँ मनपायात बियातःगु खः। तर येँ मनपाय् कर्मचारी हडतालं यानाः म्हिगः अन सफा जुइ मफुत। थुकियात हे त्वह दयेकाः परिषद् दुनेया छुं ब्राम्हणवादी मनूतय्सं नेवाःतय्सं फोहोर याना थकल धासें तोडफोड शुरु याःगु खँ धाःगु दु ।
म्हिगः थ्व समस्या लिपा तुरुन्त म्हिगः हे परिषद्या कर्मचारीत मुनाः अन सफाई अभियान न्ह्याके धुंकूगु दु।
उखे थ्व समाचारयात नेवाःतय्सं रंगशाला फोहोर याना थकल धासें गलत रुपं समाचार सम्प्रेषण यानाच्वंगु एभेन्युज टिभी च्यानल प्रति धाःसा स्थानीय नेवाः कार्यकर्ता तम्वःगु दु। उगु च्यानलं संघीय व्यवस्थां थज्याःगु फोहोर जक हइ धासें समाचार बिउगु खः। थौं आपालं मनूतय्सं उगु च्यानलय् फोन यानाः थुकिया विरोध यायेवं समाचार दिकूगु दुसा च्यानलं थुकियात कयाः स्पष्टीकरण बीकेगु खँ नं धाःगु दु ।
लुमंकेबहः जू, दशरथ रंगशाला दयेकूगु इलय् उगु लागाया स्थानीय नेवाःतय्गु हे जग्गा सरकारं अतिक्रमण यानाः काःगु खः ।
