पशुपतिया विवाद याकनं ज्यंकेमाः
पशुपति महाद्यःया देगलय् मूल भट्ट नियुक्ति यायेगु विवाद अझं तच्वया वनीगु संकेत खने दयावःगु दु । पशुपित लागाया स्थानीय नेवाःतय्के छुं हे कथंया सल्लाह मयासें पशुपति विकास कोषं मूल भट्ट नियुक्ति याःगु धासें अनया नेवाःतय्सं मूल भट्ट नियुक्तियात कयाः असहमित प्वंकाच्वंगु दु ।
पशुपति महाद्यः व उगु लागाय् छुं कथं नं स्वापू मदुपिं निम्ह ब्रम्हुतय्त मूल भट्ट दयेकूगुलिं थ्व विवाद तच्वया वंगु खः । विवादया कारणं अन जुइमाःगु नियमित नित्य पुजा तकं जुइ फयाच्वंगु मदुनि ।
थ्वहे झ्वलय् पशुपति विकास कोषं सर्वोच्च अदालतं बिउगु आदेशयातमाने यायेगु खँ धाःगु दु । थ्व छगू बांलाःगु खँ खः ।
खय्त ला सरकारं पशुपतिइ भट्ट नियुक्त यायेगु झ्वलय् पशुपति लागाय् सम्बन्धित व्यक्ति व स्थानीय जनतालिसे नं सहलह यायेमाःगु खः । तर स्थानीय जनतायात सरकारं चिउताः मक्यनेवं स्थानीय जनतां आन्दोलित जूगु दु । अले थ्व आन्दोलन आः जनस्तरय् थ्यनीगु संभावना नं अप्वया वनाच्वंगु दु । अले कोष व स्थानीय जनताया दथुइ गुगु विवाद ब्वलनाच्वंगु दु थ्व विवाद याकनं ज्यंकेमाःगु थौंया आवश्यकता खः ।
धार्मिक क्षेत्र अथें नं संवेदनशील क्षेत्र खः । अले थज्याःगु संवेदनशील क्षेत्रय् गुगुं नं कथंया हस्तक्षेप यायेगु झ्वलय् सम्बन्धित निकायं स्थानीय जनतालिसे सल्लाह ब्याकेमाःगु आवश्यकता थुकिं बोध याका बिउगु दु । अथे जुयाः आः सरकारं गुलिफु उलि याकनं स्थानीय जनताया लिसे सहलह यानाः पशुपति लागाय् ब्वलंगु विवादयात याकनं ज्यंकेगु कुतः यायेगु हथाय् जुइ धुंकूगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
