प्ररायु संघं थःगु नां हिल
येँ (सन्ध्या टाइम्स)/लहानय् न्ह्यानाच्वंगु एमालेया भ्रातृ संगठन प्रजातान्त्रिक राष्ट्रिय युवा संघ नेपालया नां आवंलि 'युवा संघ नेपाल' धकाः तइगु जूगु दु ।
संघया न्हूगु नेतृत्वया निंतिं थौं न्हिनंनिसें मतदान न्ह्याकेत्यंगु दु। वंगु चान्हय् तक नं युवा संघ नेपालया न्हूगु नेतृत्वया निंतिं सहमति यायेगु कुतः याःसां सहमति मजूगुलिं मतदान यायेत्यंगु खः। निवर्तमान महासचिव इन्द्रलाल सापकोटा व दांभरी महेश बस्नेतं नायः पदया नितिं उम्मेदवारी बिउगु दु ।
उगु संघय् बहुपदीय पद्धति कथं आवंलि छम्ह नायः, न्याम्ह न्वकु, छम्ह मू छ्याञ्जे, स्वम्ह छ्याञ्जे व छम्ह दांभरी दइगु जूगु दु ।
