सामान्य अंकं नेप्से क्वय्
येँ (सन्ध्या टाइम्स)/स्टक एक्सचेन्जय् थ्व वाःया न्हापांगु न्हि जूगु शेयर कारोबारं नेप्से परिसुचक सामान्य अंकं कुहां वंगु दु। वाःया न्हापांगु नेप्से कुहां वनेगु झ्वलय् तःक्वःमछिं हे सुचक थहां कुहां जुयाच्वंगु खः। बजाः चालेवं हे नेप्से परिसुचक कुहां वयेगु शुरु जूगु खःसा वयां छुं ई लिपा हे थहां वना हाकनं कुहां वःगु खः। शेयर बजाः बन्द जुइ स्वयां न्ह्यः तक नं थ्व क्रमं मदिक निरन्तरता कया च्वन। वंगु वालय् बजाः बन्द जुइ न्ह्यः तकया कारोबारं नेप्से परिसुचक थहां वंगु खः ।
कारोबार जूगु उपसुचकय् फाइनान्स, वीमा व अन्य समुहया कारोबार कुहां वनेवं नेप्सेय् थुकिया नकारात्मक लिच्वः लाःवंगु खः। गुकिया कारणं म्हिगः नेप्से शुन्य दशमलव ३९ अंकं कुहां वनाः ५४५ दशमलव २७ अंकय् थ्यंगु दु। कारोबार जूगु परिसुचकय् सेन्सेटिभ शुन्य दशलमव शुन्य २या सामान्य अंकं थहां वंगु दुसा फ्लोट शुन्य दशमलव शुन्य ७ अंकं कुहां वःगु दु ।
कारोबार जूगु उपसुचकय् वाणिज्य व विकास समुह थहां वंसां मेगु समुहया कारोबार कुहां वःगुलिं उकिया प्रभाव नेप्सेय् लाःगु खः। वाणिज्य समुहया सुचक १ दशमलव २३ अंकं थहां वनाः ५२५ दशमलव ८३ अंकय् थ्यंगु दु। अथे हे दकलय् अप्वः विकास बैंक समुह २ दशमलव ९८ अंकं थहां वनाः ५९५ दशमलव शुन्य ८ अंकय् थ्यंगु दुसा जलविद्युत समुहया सुचक नं शुन्य दशमलव ३२ अंकं थहां वनाः ८०१ दशमलव शुन्य २ अंक थ्यंगु दु ।
उखे कारोबारय् कुहां वःगु उपसुचकय् फाइनान्स समुह दकलय् अप्वः १२ दशमलव ८ अंकं कुहां वनाः ५५१ दशमलव १८ अंकय् थ्यंगु दु। वीमा समुहया सुचक नं शुन्य दशमलव १३ अंकं कुहां वनाः ५७४ दशमलव २९ अंकय् थ्यंगु दु अथे हे अन्य समुहया सुचक १ दशमलव १८ अंकं कुहां वयेवं ५८७ दशमलव ४६ अंकय् थ्यन ।
नेपाःया वित्तीय क्षेत्रय् न्हापांखुसी निगू फाइनान्स कम्पनी मर्ज जुयाः छगू हे जूगु नारायणी नेशलन फाइनान्सं नं थःगु कारोबार शुरु याःगु दु। थुगु कम्पनीया शेयर प्रति कित्ता ४८०/- तका दामं तक न्याये-मी जूगु स्टक एक्सचेन्जं जानकारी बिउगु दु। स्टक एक्सचेन्जय् न्यय्गुंगू कम्पनीया शेयर कारोबार जुयाः न्हय्न्हय्द्वः व गुसः व ख्वीगू कित्ता शेयर न्याये-मी जुयाः प्यंगू करोड झिंगुंगू लख न्यय्स्वद्वः तका दांया कारोबार जुल ।
स्टायण्डर्ड चार्टर्डया शेयरय् ६०/- व आईसिएफसीया शेयरय् ३४/- तका दां प्रति कित्ता शेयरय् थहां वंगु दुसा दकलय् अप्वः एभरेष्ट बैंया शेयरय् प्रति कित्ता ५७/- तका व ग्लोबल बैंकया शेयरय् प्रति कित्ता २७/- तका दां कुहां वःगु दु ।
भिवोर विकास बैंकं दां ल्याखं दकलय् अप्वः न्हय्स्वंगू लख पीद्वः तका दांया शेयर कारोबार याःगु दु। आईसिएफसी वित्तीय संस्थां दकलय् अप्वः लबः काःगु दुसा उखे मर्ज जुयाः कारोबार शुरु याःगु नारायणी नेशनल फाइनान्सं दकलय् अप्वः द्यापं फःगु दु ।
