चितवनय् बम विष्फोटय् लानाः स्वम्ह सित

पूर्वी चितवनया भण्डारा गाविसया सुन्दरवस्तीइ च्वंगु छखाः छेँय् सोमवाः सुथय् बम विष्फोट जुया छखाः हे छेँया स्वम्ह सीगु दुसाः निम्ह गम्भीर घाःपाः जूगु दु ।

सुन्दरबस्तीया नापसं लाःगु जंगलय् लुइकूगु बम शुक्रबहादुर राईया छेँय् मस्तय्सं हःगु खः । सुथय् झिताःत्याः इलय् जूगु बम बिष्फोटय् लानाः पीन्यादँया जानुका राई, झिंच्यादँया राममाया राई व झिन्यादँया राजकुमार राई सीगु खः । अथेहे झिंदँया अरबिन्द राई व नीछदँया रामकुमार राई गम्भीर घाःपाः जूगु खः । घाःपाः जूपिंत वासः याकेगु निंतिं भरतपुर अस्पतालय् भर्ना याःगु दु ।

घटनास्थलय् वनाः प्रहरीं थुकीया बारे थप अनुसन्धान यानाच्वंगु दु ।