पत्रकार टीका विष्टयात माओवादीं आक्रमण : कांग्रेस सभासद्
सत्तारुढ नेपाली कांग्रेसया सभासदं पत्रकार टीका विष्टयात एनेकपा (माओवादीं) हे आक्रमण याःगु द्वपं ब्यादीगु दु ।
व्यवस्थापिका संसदया आइतवाःया बैठकय् न्ववासें कांग्रेस सभासद्त शोभाकर पराजुलीं माओवादीं हे आक्रमण याःगु द्वपं बियादीगु ख: । वयेकलं कांग्रेस नेतात शेरबहादुर देउवा, डा. प्रकाशशरण महत, गगन थापायात नं माओवादीं आक्रमण यानाः स्यायेगु कुतः याःगु धयादिल । वयेकलं माओवादीं ल्वाभःया आडय् जनता दथुइ भय व त्रास ब्वलंकाः च्वंगु धयादिल ।
अथेहे माओवादी सभासद् लोकेन्द्र विष्टं रुकुमया पत्रकार टीका विष्टयात माओवादीं आक्रमण मयाःगु धयादिसें थुगु घटनाय् माओवादीयात द्वपं बियाः बदनाम यायेगु कुतः याःगु धयादिल । अथेहे वयेकलं मानव अधिकार उल्लंघन याःगु ठहर जुइधुंकूम्ह मेजर निरञ्जन बस्नेतायात कारवाही यायेगु पलेसा सरकारं सुस्केगु ज्या याःगु द्वपं बियादिल । वयेकलं थुकीं संविधान व अदालतया अवहेलना याःगु नं धयादिल ।
एमाले सभासद् धीरेन्द्रबहादुर श्रेष्ठं पार्टीया सल्यान अधिवेशनय् माओवादीं आक्रमण यानाः शान्ति प्रकृया हे अवमुल्यन याःगु धयादिल । मधेशी जनअधिकार फोरमया जयप्रकाशप्रसाद गुप्तां मधेश आन्दोलनय् न्य्यप्यम्ह सहिद जुसां नीन्याम्हेसित जक सहिद घोषणा याःगुलिं आपत्ति प्वंकादिल ।
व्यवस्थापिका संसदया आइतवाःया बैठकय् अपांगता जूपिं मनूतय् अधिकार सम्बन्धी महासन्धि व इच्छाधिन अभिलेख, २०६६यात अनुमोदन यायेमाःगु प्रस्ताव स्वीकृत याःगु दु । महिला बालबालिका तथा समाजकल्याण मन्त्री सर्वदेवप्रसाद ओझां उगु प्रस्ताव पेश यानादीगु खः ।
व्यवस्थापिका संसदया बैठक सोमवाः न्हिनसिया छताः ईलय् हानं च्वनीगु जूगु दु ।
