थुकथं जुल नेवाः स्वायत्त राज्य घोषणा

न्ह्याबलें धइथें फुटबल कासाय् जक भिड जुइगु येँया दशरथ रंगशाला म्हिगः छगू बिस्कं ज्याझ्वःया कारण टन्न जाल। दशरथ रंगशाला थौंकन्हय् फुटबल कासा जुइबलय् नं अपाय्च्वः मजाः। तर म्हिगः फुटबल मजू कुन्हु नं रंगशाला टन्न जाल। म्हिगः रंगशाला टन्न जाःगु कारण खः, नेवाः स्वायत्त राज्य घोषणा ।

नेपालभाषा ख्यःया थीथी जाति, थीथी पेशा, थीथी खलः पुचः व थीथी राजनीतिक पार्टीलिसे आवद्ध नेवाः पुचःत जानाः म्हिगः नेवाः स्वायत्त राज्य घोषणा ज्याझ्वः जूगु खः। उगु ज्याझ्वलय् स्वतःस्फुर्त रुपं मुं वःपिं नेवाःतय्सं रंगशाला जायेकूगु खः ।

नेवाः स्वायत्त राज्य मंकाः संघर्ष समितिया ग्वसालय् जूगु उगु घोषणा ज्याझ्वः नेपाःया राष्ट्रिय गान हालाः शुरु जूगु खः। ज्याझ्वलय् नेवाः राज्यया राष्ट्रिय म्येँ हालेगु नापं नेवाः ध्वाँय् झण्डोत्तोलन यायेगु ज्या नं जूगु खः। जनकवि दुर्गालाल श्रेष्ठं च्वयाः तीर्थ मालीं संगीत तयादीगु उगु राष्ट्रगान नेपालभाषाया आपालं नांजाःपिं गायक गायिकापिंसं प्रत्यक्ष हालादीगु खः। मंगल धुनया दथुइ थीथी जातीय खलः पुचःया नायः व नकिंतय्सं बखुं ब्वयेकाः ज्याझ्वः उलेज्या याःगु खःसा ग्वसाः खलः नेवाः स्वायत्त राज्य मंकाः संघर्ष समितिया थीथी घटकया नायःतय्सं नेवाः ध्वाँय् झण्डोत्तोलनया ज्या याःगु खः। अथे हे पद्मरत्न तुलाधर लगायत थीथी नेवाः न्ह्यलुवापिंसं 'नेवाः स्वायत्त राज्य जिन्दावाद' धकाः नारा च्वयातःगु ब्यानर बेलुनय् चिनाः ब्वयेका छ्वःगु खः ।

नेवाः स्वायत्त राज्य मंकाः संघर्ष समितिया नायः नरेन्द्र भक्त हाडाया सभापतित्वय् जूगु उगु ज्याझ्वः समितिया दुजः मल्ल के. सुन्दरं ताःलाक सञ्चालन यानादीगु खः। समितिइ दुथ्याःगु थीथी घटकया नायःतय्सं नेवाः स्वायत्त राज्यया भाषा, सांस्कृतिक नीति, शिक्षा नीति, आर्थिक नीति, सञ्चार नीति आदि गज्याःगु जुइ धकाः च्वयातःगु लिखित दस्तावेज अन ब्वनाः प्रस्तुत यानादीगु खः ।

ज्याझ्वलय् थीथी जनजाति पुचःया नायः नापं थीथी राजनीतिक पार्टीया प्रतिनिधितय्सं नं संवोधन यानादीगु खः।
संविधानसभाय् दुथ्याःपिं जनजाति सभासद् पुचःया अध्यक्ष आईपी गुरुङं नेवाः स्वायत्त राज्य घोषणा ज्याझ्वः ताःलायेमा धकाः भिंतुना बिसें थौंकन्हय् फुक्क हे राजनीतिक पार्टीया शीर्षस्थ नेतात ब्रम्हू जक जुयाच्वंगुलिं देशं गति काये मफयाच्वंगु खः धयादिल। राजनीतिक पार्टीत थःपिंसं हे फुक्क जातियात स्वायत्तता बिया बिउगु जूसा सुनां नं दवाव बीमाःगु आवश्यकता मदइगु बिचाः नं वय्कलं प्वंकादिल।
नेपाल आदिवासी जनजाति महासंघया नायः पासाङ शेर्पां नेवाः स्वायत्त राज्य घोषणायात देय्या सम्पूर्ण जनजातिया भिंतुना दु धयादिल। थौं नेवाःतय्सं स्वायत्त राज्य घोषणा याः थें कन्हय् मेमेगु जातितय्सं नं थःपिनि राज्य घोषणा यानाः थःपिनि अधिकार सुनिश्चित यायेमाःगु बिचाः वय्कलं प्वंकादिल ।

ज्याझ्वलय् येँ, यल, किपू, भ्वँत आदि लागां आपालं नेवाःत बाजं सहित सहभागी जूगु खः। दशरथ रंगशालाया सम्पूर्ण दर्शकदीर्घा जायाः नं सहभागीत फुटबल ग्राउण्डय् समेत फ्यतू वःगु खः ।

नेवाः स्वायत्त राज्य घोषणा ज्याझ्वलय् नेपालभाषा आन्दोलनय् आः तक सक्रिय जुया च्वनादीपिं सत्यमोहन जोशीं निसें कयाः सकलें न्ह्यलुवात नं उपस्थित जुयादीगु खः।
उगु सभाय् एनेकपा (माओवादी)या न्वकु नारायणकाजी श्रेष्ठ' प्रकासं' थौंया इलय् संघियता व नेवाः स्वायत्त गणराज्य विरोधीतय्गु निंतिं नेवाः जनस्तरं याःगु नेवाः स्वायत्त गणराज्य छगू तःधंगु धक्का खः धयादिल। वय्कलं थःपिनिगु पार्टीपाखें न्हापा हे नेवाः स्वायत्त गणराज्य घोषणा याये धुनागु खँ न्ह्यथँसें नेवाःतय्सं मंकाः कथं याःगु नेवाः स्वायत्त राज्यपाखें आः मेमेगु आदिवासी जनजातितय्सं नं सयेका काइ धयादिल ।

दशरथ रंगशालय् जूगु उगु नेवाः स्वायत्त राज्य घोषणा सभाय् नेकपा (एमाले)या केन्द्रीय दुजः राजेन्द्र श्रेष्ठं नेवाः स्वायत्त राज्य धइगु तामाङतय्सं घेरे याना तःगु जुइ मजिउ धयादिसें थःपिनिगु पार्टींपाखें नेवाः स्वायत्त राज्यया स्पष्ट किपा तकं तयाः पार्टीया ख्वाःपतिइ पिकाये धुनागु दु धयादिल ।

नेपाली कांग्रेसया सभासद् तीर्थराम डंगोलं थौं फुक्क हे बिचाःया नेवाःत छथाय् च्वनाः जुयाच्वंगु थ्व घोषणायात आः सुनां नं नकारे याये फइ मखु धयादिल ।

नेपाः राष्ट्रिय पार्टीया नायः डा. केशवमान शाक्यं नेवाःतय्सं जनस्तरं मंकाः कथं नेवाः स्वायत्त राज्य घोषणा याःगु धइगु नेवाःत मानसिक रुपं बिजय जुइधुंकल धयादिल । वय्कलं राष्ट्रिय संवत नेपाल संवत्यात संवैधानिक रुपं मान्यता कायेगु नितिं थःपिनि पार्टीपाखें संविधानसभाया संवैधानिक समितिइ तयागु प्रस्तावयात कयाः चुनाव जूगु इलय् नेपाः राष्ट्रिय पार्टीया सभासद् बुद्ध साय्मि व एमालेया सभासद् सपना प्रधान मल्लं बाहेक मेमेपिं नेवाः व आदिवासीतय्सं भोट मतःगु खँ कनादिल ।