थथे नं खने दत घोषणा सभाय्

नेवाः स्वायत्त घोषणा यायेगु म्हिगःया ज्याझ्वःयात सम्पूर्ण नेवाःतय्सं छगू उत्साह व गौरवया रुपय् काःगु दु। ज्याझ्वलय् उपस्थित जूपिं सकस्यां थ्वहे महसुस याःगु खने दत ।

सुथय् ११ बजे थीथी थासं जुलुस पिकयाः १ बजे तकया दुने ज्याझ्वः शुरु यायेगु ग्वसाः खलः नेवाः स्वायत्त राज्य मंकाः संघर्ष समितिं तयातःगु खःसां न्हिनय् २ बजे तक ला जुलुस वयेगु हे मदिउनि। खास यानाः यलं वःगु जुलुसं यानाः उगु लागाय् मुक्कं हे गाडी जाम जूगु खःसा यलय् ला जावलाख्यलं थुखे ट्राफिकं हे लँ पना बिउगु खः ।

र्‍याली वःगु वलं तुं जूगुलिं बियातःगु ई स्वयां लिबाक जक ज्याझ्वः शुरु याये माल। करिब ३७ हजार दर्शकया क्षमता दुगु रंगशाला म्हिगः टन्न हे जायाः नं फुटबल ग्राउण्डय् तकं मनू च्वंगु खः। अझ पिने पिने च्वनाच्वंपिं मनूत उतिकं हे दनि। मनूतय् उपस्थितिं म्हिगः सकस्यां नुगः चकंका बिउगु खने दत। मेथाय् जूसा मू वक्ता जुयादीम्ह भाषा आन्दोलनया न्ह्यलुवा मल्ल के. सुन्दर म्हिगः ज्याझ्वःया उद्घोषक जुयादीगु खः ।

नेवाःतय्सं स्वायत्त राज्य घोषणा यानाः देय् कुचा याइन धकाः पूर्वाग्रहपूर्वक द्वपं बीपिं नं दुगुलिं म्हिगःया ज्याझ्वः नेपाःया राष्ट्रिय गान ''सयौं थुंगा फूलका हामी...'' हायेकाः शुरु याःगु खः। ज्याझ्वः शुरु जुइधुंकाः नेवाः स्वायत्त राज्यया राष्ट्रिय गान धाःसा प्रत्यक्ष हायेकूगु खः। नांजाःम्ह संगीतकार तीर्थ मालीं संगीत तयादीगु उगु म्ये म्हिगः अन हे वयाः नांजाःपिं गायक रामेश व रायन लगायत अमरराज शर्मा, सतिश महर्जन, सुलिन्द्र शाक्य, रीता महर्जन, रत्नशोभा महर्जन, रानीशोभा महर्जन आदिपिंसं प्रत्यक्ष रुपं हालादीगु खः ।

नेवाः ध्वाँय् झण्डोत्तोलन याःबलय् अन तयातःगु च्यापु ध्वाँय् मध्ये च्वय् थहां वँवं हे निपु ति कुतुं वल। तर ध्वाँय् कुतुं वःसां उकिं ज्याझ्वः धाःसा मपं। व न्ह्याना हे च्वन।
ज्याझ्वलय् वक्ता जुयादीपिं सकलें ग्वसाः खलकय् दुथ्याःगु घटकया नायःत जक खःसां अन नेपालभाषा आन्दोलनया सकलें न्ह्यलुवात सत्यमोहन जोशी, पद्मरत्न तुलाधर नापं थीथी राजनीतिक दलया प्रतिनिधित नं दुगु खः ।