नेवाः स्वायत्त राज्य घोषणा ज्याझ्वलय् सहभागी नेवाः खलः पुचःत
नेवाः स्वायत्त राज्य घोषणाया झ्वलय् म्हिगः जूगु समारोह अन उपस्थित मनूतय् संख्याया ल्याखं जक मखु अन ब्वति कायेत वःगु थीथी खलः पुचःया ल्याखं नं ऐतिहासिक जूगु दु। ज्याझ्वलय् नेपालभाषा ख्यलय् न्हापांनिसें सक्रिय जुया वयाच्वंगु थीथी भाषिक व जातीय खलः पुचः जक मखु थ्वहे घोषणाया झ्वलय् गठन याःगु थीथी पेशागत खलः पुचःतय् नं बांलाःगु उपस्थिति दुगु खः ।
ज्याझ्वलय् नकतिनि गठन जूगु नेवाः स्वास्थ्यकर्मी, नेवाः
वकिल व नेवाः इन्जिनीयर पुचः नं थःपिनि ब्यानर हे ब्वयाः उपस्थित जूगु खः। अथे हे त्रिवि अन्तर्गत सक्रिय नेवाः प्राध्यापक कर्मचारी पुचलं नं उकी ब्वति काःगु खः।
उकथं हे ज्याझ्वलय् थीथी स्कूलया विद्यार्थीतय्सं नं स्कूलया ब्यानर हे ज्वनाः ब्वति काःगु खः ।
म्हिगः उगु ज्याझ्वलय् ब्वति काः वःपिं खलः पुचःत मध्येय् यलया ज्यापु समाजया नेतृत्वय् वःगु र्याली तसकं तःधंगु खने दत। उगु र्यालीं यानाः येँ जक मखु यलय् तकं ट्राफिक जाम जूगु खः ।
उकथं हे येँया ज्यापु महागुथिं येँया अष्टमातृका चाःहिलाः र्याली पिकाःगु खः। ज्यापु महागुथिया र्यालीयात संविधानसभाय् दुथ्याःपिं निम्ह ज्यापु सभासद्पिं तीर्थराम डंगोल व दिलीप महर्जनं त्वाःदेवाय् मत च्याकाः उलेज्या यासे न्ह्याकूगु खः। लिसें र्याली न्ह्याके न्ह्यः र्याली व्यवस्थापन समितिया संयोजक राजभाई जकःमिं नेवाः ध्वाँय् छपु अष्टमातृकायात देछायाः र्याली आरम्भ यानादीगु खः। ज्याझ्वलय् बज्र कला कुञ्चपाखें थःपिनि कलाकारतय्त अष्टमातृकाया भेष पुंकाः ब्वति कायेकूगु खः। गुगु ज्याझ्वःया अन्तिम तकं आकर्षणया केन्द्र जुयाच्वन।
ज्याझ्वलय् ब्वति काः वःपिं ज्यापु समाजया दुजःत अप्वः यानाः ज्यापु वसतय् हे वःगुलिं रंगशालाया दक्षिणी ब्व पूरा हे ज्यापु वसतं झःझः धाःगु खः। अथे हे गुलिखे पुचःत अन हे भ्वय् ज्वलं समेत ज्वनाः वःगु खःसा वय्कःपिंसं रंगशालाय् हे च्वनाः भ्वय् नयेगु ज्या नं याःगु खः ।
ज्याझ्वःजःछि बाजं ज्वना वःगु खलः पुचःत अन हे शिष्टपूर्वक च्वनाच्वंगु खःसा ज्याझ्वय् न्ववाःपिं गुलिखे वक्तातय्त लसकुस यायेत उमिसं बाजं थानाः उल्लास ब्वलंकूगु खः ।
