घोषणाया लसताय् दिपावली
येँ (सन्ध्या टाइम्स)/येँया दशरथ रंगशालाय् नेवाः स्वायत्त राज्य घोषणा जूगु लसताय् म्हिगः हे पिने पिने जिल्लाय् नं उकियात लसकुस यासें दिपावली यायेगु ज्या जुल। म्हिगः बहनी येँ, यल, ख्वप, थिमि, किपूया न्हूबजाः लागाय् नापं स्वनिगःया नेवाःतय्गु गांगामय् हे दिपावली याःगु खः। अथे हे येँया वंघः, कमलाछि, किलागः, असं त्वालय् मत च्याकाः व मन्दः च्वयाः दिपावली याःगु खः ।
दशरथ रंगशालाय् घोषणा सभा जुयाच्वंगु हे इलय् पूर्वया पाँचथरय् उकियात लसकुस यासें सभा यायेगु ज्या जूगु खः। अथे हे वहे इलय् इटहरि, धरान, हेटौंडा, धनकुटाय् नं स्थानीय नेवाः पुचःतय्सं र्याली पिकयाः नगर चाःहिलेगु ज्या याःगु खः। आपालं जिल्लाय् बहनी मत च्याकाः दिपावली यायेगु ज्या जूगु खः ।
पिने जिल्लाया नेवाःतय्सं थ्व घोषणायात नेवाःतय्सं थःपिंत थःपिंसं हे शासन यायेगु अधिकार काःगु दिवसया रुपय् हनेमाःगु बिचाः बिउगु दु ।
