नेवाः स्वायत्त राज्य घोषणां जनजातित उत्साहित
येँ (सन्ध्या टाइम्स)/ नेपालमण्डलया आदिवासी नेवाःतय्सं म्हिगः तःजिक ज्याझ्वःया दथुइ न्हूगु संविधानय् संघीय गणतन्त्र नेपाः दुन नेवाः स्वायत्त राज्य दयेमाः धकाः जनस्थतरं नेवाः स्वायत्त राज्य घोषणा याःगु ज्याझ्वलं याना नेपाःया आदिवासी जनजातित तसकं हे उत्साहित जूगु दु।
नेवाःतय्गु इतिहासय् हे न्हापांखुसी थःपिनिगु हक, अधिकारया नितिं थुलिमच्छि नेवाःत छप्पँ जुयाः छगू हे इलय् सांस्कृतिक बाजं नापं ज्वना सडकय् क्वहांवःगु दशरथ रंगशालाया उगु ज्याझ्वःयात टेलिभिजन, एफ एमपाखें प्रत्येक्ष प्रशारण याःगु हुनिं व ज्याझ्वः स्वयेगु व ज्याझ्वःया बारे न्यनेखना उगु कथं आदिवासी जनजातित उत्साहित जूगु खः धकाः नेवाः स्वायत्त राज्य मंकाः संघर्ष समितिं धाःगु दु ।
आदिवासी जनजातिया न्ह्यलुवाःतय्सं फोन याना बधाई बिइपिं व आः जातीय स्वात्तता नापं स्वशासनया आन्दोलन नेवाःतय्सं हे यायेमाः धकाः धाःगु खँ नेवाः स्वायत्त राज्य मंकाः संघर्ष समितिया दुजः नापं नेवाः देय् दबूया संरक्षक मल्ल के सुन्दरं 'सन्ध्या टाइम्स'यात कनादीगु दु ।
अथे हे आदिवासी जनजाति संयुक्त मोर्चाया छ्याञ्जे कुमार योञ्जनं नं नेवाःतय्गु स्वायत्त राज्य घोषणां आदिवासी जनजातितय्त उत्साहित यानाब्यूगु दु धकाः धयादीगु दु ।
