पशुपतिइ संघर्षया तयारी
पशुपतिइ मूलभट्ट हिलाः पुजारी नियुक्त याःगु खँय् पिदंगु विवादया झ्वलय् म्हिगः ल्हाः समेत तयेगु ज्या जुइवं आः थ्व समस्या अझ तच्वया वनीगु खतरा ब्वलंगु दु । अनया भण्डारीतय्सं गठन यानातःगु संघर्ष समिितं आः थःपिनि संघर्ष अझ तच्वयेक न्ह्याकीगु जुयाच्वंगु दु । थौं संघर्ष समितिया बैठक च्वनाच्वंगु दुसा सम्भवतः थौं हे संघर्षया ज्याझ्वः नं पिहां वये फुगु खँ धाःगु दु । म्हिगः पशुपति लागाय् दागादुगु जूबलय् ल्हाः समेत तःबलय् छुं भण्डारीत घाःपाः नं जूगु खः ।
मेखे पशुपतिइ ब्वलंगु थ्व विवाद बारे जानकारी कायेत थौं एमालेया केन्द्रीय नेतातय्सं ८ वडाया एमाले कार्यकर्तातय्त बल्खुइ सःताः न्यनेकने याःगु दु । एमालें पशुपतिया पुजारी नियुक्त यायेगु ज्याय् जूगु त्रुटियात भिंकेमाः धायेधुंकूगु दु ।
थ्वहे झ्वलय् पशुपतिइ ब्वलंगु थ्व विवादय् नेवाः खलः पुचःतय्सं नं सरोकार क्यना हःगु दु । नेवाः जागरण माचं थौं छगू वक्तव्य पिकासें पशुपतिइ पुजारी नियुक्त यायेगु ज्याय् स्थानीय भण्डारीतय्त छखे लाकेगु धइगु स्वायत्त शासनया विपरित ज्या खः धासें उकी राजनीतिक हस्तक्षेप मयायेत इनाप याःगु दु । वक्तव्यय् स्थानीय सरोकारवालातलिसे सल्लाह यानाः समस्या ज्यंकेत नं इनाप यानातःगु दु ।
