नेवाः स्वायत्त राज्य घोषणा
नेवाः ध्वाँय्या झण्डोतलन / लखौं मनूतय् ब्वति
नेवाःतय्सं थःगु लागाय् नेवाः स्वायत्त राज्यया घोषणा याःगु दु । शनिवाः येँया दशरथ रंगशालाय् जूगु छगू विशेष आमसभाया दथुइ उगु घोषणा याःगु खः । नेवाः जातितय् स्वीछगू जातिय खल पुचया छम्ह मिजं व छम्ह मिसाः प्रतिनिधितय्सं मञ्चं बखुं ब्वयेकाः उगु घोषणा याःगु खः । घोषणा नापं नेवाःतय् मंकाः ध्वाँय् नेवाः स्वायत्त संघर्ष समितिया झिगूलिं खल पुचया प्रतिनिधितय्सं ब्वयकूगु खःसाः नेवाःतय् राष्ट्रिय म्येँ नं थीथी कलाकारतय्सं हाःगु खः ।
नेवाःत थःगु अधिकार सनिश्चितताया निंतिं आन्दोलित जुयागु व नेवाःत विखण्डणकारी व सामप्रदायीक मखुगु प्रमाण कथं नेपाःया राष्ट्रिय म्येँ ज्याझ्वलय् न्हापा ह्याकूगु खसाः नेपाः दुनेया नेवाः स्वयात्त राज्यया म्येँ लिपाः ह्याकूगु खः ।
अथेहे थीथी संचार माधयमं जातिय स्वाशसनं देय् विखण्डण जुइ व नेवाःत नं अज्याःगु हे ज्या यानाच्वंगु द्वपं बियाच्वंगुयात मखुगु साबित यासें व नेवाःतय्त नं थःगु देय् उलि हे यः धइगु दसू कथं नेवाः राष्ट्रिय ध्वाँय्या उच्च सम्मान यासें उकीयात बिच्चे लाकाः जखः न्यागू-न्यागू नेवाः ध्वाँय् ब्वयेकूगु खः ।
ज्याझ्वलय् ब्वति काःपिं दक्वःसिनं थःगु नुगलय् ल्हाः तयाः व थःगु थासं दनां 'नेवाः झी नेवाः हे जुइ', 'नेवाः नेवाः छवाः खः', 'नेवाः स्वायत्त राज्य जिन्दावाद'या नारा थ्वयेका: शुरु जूगु ज्याझ्वलय् नेवाः स्वायत्त राज्य दुनेया भाषिक, संस्कृतिक, शैक्षिक, समावेशी, गौर नेवाः व अल्पसंख्यकतय् नीतित नं न्ह्यब्वःगु खः ।
उगु हे ज्याझ्वलय् थीथी राजनीतिक दलया नेवाः नेतातय्सं ऐक्वयबद्धा प्वंकादिसें न्ववादीगु खः । ज्याझ्वलय् एनेकपा (माओवादी)या उपाध्यक्ष नरायणकाजी श्रेष्ठ 'प्रकाश', नेपाली कांग्रेसया सभासद् तीर्थराम डंगोल, नेकपा (एमाले)या स्वनिगः इन्चार्ज राजेन्द्र श्रेष्ठ व नेपाः राष्ट्रिय पार्टीया अध्यक्ष डा. केशवमान श्रेष्ठं न्ववानादीगु खः ।
ज्याझ्वलय् नेवाः म्येँ च्वयादीम्ह जनकवि दुर्गालाल श्रेष्ठ व लाय् चिनामी तीर्थ माली नापं नेवाः ध्वाँय्या परिकल्पनाकार रामकृष्ण नकःमिया सम्मान नं याःगु खः । अथेहे ज्याझ्वलय् 'नेवाः स्वयात्त राज्य जिन्दावाद' धकाः च्वयातःगु कापः व नेवाः ध्वाँय् सहितया बेलुन संघर्ष समितिया सल्लहाकारत पद्मरत्न तुलाधर, तीर्थराम डंगोल व भिम्सेनदास श्रेष्ठं ब्वयेकादीगु खः । ज्याझ्वलय् थीथी सांस्कृतिक ज्याझ्वः नं न्ह्यःब्वःगु खः ।
लखौं मनूतय्सं ब्वति का:गु उगु ज्याझ्वया सभापतित्व संघर्ष समितिया नायः नरेन्द्रभक्त हाडां यानादीगु ख: । उगु ज्याझ्वलय् नेवाः देय् दबूया नायः नरेश ताम्रराकारं लसकुस यानादीगु खःसा भिम्सेनदास प्रधानं सुभाय् देछानादीगु खः । ज्याझ्वः नेवाः देय् दबूया संरक्षक मल्ल के. सुन्दर व देय् दबूया छयाँजे रजनी मीलां न्ह्याकादीगु खः ।
ज्याझ्वः स्वयां न्ह्यः स्वनिगः दुने व पिनेया थीथी थासं आपालं मनूत र्याली सहित ज्याझ्वः स्थल थ्यंकूगु खः । नापं यक्व मनूत परम्परागत वसः व सांस्कृतिक झाँकी सहित ज्याझ्वलय् ब्वति काःगु खः ।
स्वायत्त घोषणा नापं आः स्वनिगः दुने व स्वनिगः पिने नेवाः बाहुल्य लागाय् जुलुस सहित दिपावली यायेगु ज्या जुयाच्वंगु दु ।
(किपा: - सुनिता श्रेष्ठ राजभण्डारी)
मेमेगु आपालं किपाया लागि थन क्लिक यानादिसँ
