नेवाः स्वायत्त राज्य घोषणासभाय् जूगु प्रमुख ज्याझ्व:

नेवाः राज्य मंकाः संघर्ष समितिया ग्वसाःलय् येँया त्रिपुरेश्वरय् च्वंगु दशरथ रंगशालाय् नेवाः स्वायत्त राज्य घोषणा या:गु दु ।

ज्याझ्वलय् ब्वति का:पिं दक्वःसिनं थःगु नुगलय् ल्हाः तयाः व थःगु थासं दनां 'नेवाः झी नेवाः हे जुइ', 'नेवाः नेवाः छवाः खः', 'नेवाः स्वायत्त राज्य जिन्दावाद' धकाः ज्याझ्वः शुरु जूगु खः ।

नेवाः स्वायत्त राज्य घोषणासभाय् जूगु प्रमुख ज्याझ्व: -

- ज्याझ्वलय् नेवाः स्वायत्त राज्य घोषणा प्रति एक्यबद्धता प्वंकेत नेपाल आदिवासी जनजाति महासंघया अध्यक्ष पासांङ शेर्पा, संविधानसभाय् थीथी दल पाखें प्रतिनिधित्व यानाच्वंपिं आदिवासी जनजाति सभासद्तय् मंकाः संजाल ककसया अध्यक्ष आइबी गुरूङ नापं थीथी जनजाति संघसंस्थाया प्रतिनिधितय् ब्वति ।
- आसनग्रहण यायेगु ज्याझ्व ।
- नेवाःत विखण्डणकारी व सामप्रदयीक जाति मखु व नेवाःतय् नं थःगु देय् उलि हे यः धइगु दसू कथं नेपाःया राष्ट्र गान हायेकाः ज्याझ्वः शुरु ।
- शहिद व नेवाः आन्दोलनया निंतिं जीवन फ्यानावंपिं हनेवहपिंनि निंतिं श्रदानजली कथं मौन धारण यात ।
- नेवाः समुदाय दुने जातिय भेदभाव मदुगु चिं कथं नेवाःतय् थीथी जातिय खलःया छम्ह मिजं व छम्ह मिसा: प्रतिनिधिपिंसं छक्वलं मंञ्च बखुं ब्वयेकल । उगु इलय् थीथी बाजं खलःतय्सं मंगल धुन पूगु खः ।
- नेवाः देय् दबूया नायः व नेवाः स्वायत्त राज्य मंकाः संघर्ष समितिया छयाँजे नरेश ताम्राकार पाखें लसकुस न्वचू बियादिल । वयेकलं नेवाः स्वायत्त मंकाः संघर्ष समिति निस्वंगु बारे कनादिल ।
- नेवाः मंकाः स्वयात्त संघर्ष समितिया झिगू दुजः खल:या झिम्ह प्रतिनिधितयसं नेवाः ध्वाँय् झण्डोतलन यानादिल । झण्डोतलन लिपाः हानं दक्वं मनूत थःथःगु थासं दनां 'नेवाः स्वायत्त राज्य जिन्दावाद', 'नेवाः झी नेवाः हे जु' व 'नेवा: एकता जिन्दावाद' धकाः नारा थ्वयेकूगु खः ।
- नेपा:या राष्ट्रिय ध्वाँय् स्वकूं ला:गु चन्द्रमा व सुर्यद्य: दुगु ध्वायँ हे ख:, थौं झण्डोतलन या:गु ध्वाँय् नेवा: स्वायत्त राज्यया जूगुलिं थुकी अलमल मजुइत इनाप ।
- जनकवि दुर्गालाल श्रेष्ठं च्वयादीगु व तीर्थ मालीजूं लय् तयादीगु नेवाः राष्ट्रिय म्येँ हाल । म्येँयात गायकत रामेश, रायण, रामकृष्ण दुवाल, अमरराज शर्मा, पवित्र कसाः, सुलिन्द्र शाक्य लगायत कलाकारतय्सं मञ्चं हालादीगु दुसा: ज्याझ्वलय् ब्वति काःपि दक्वसिनं थःथःगु थासं हालादीगु खः ।
- नेवाः राष्ट्रिय म्येँ च्वयादिम्ह जनकवि दुर्गालाल श्रेष्ठ व लय् चिनादिम्ह तीर्थ माली नापं नेवाः ध्वाँय्या परिकल्पनाकार रामकृष्ण नकःमिजूयात सम्मान ।
- संघर्ष समितिया सल्लहाकारत पद्मरत्न तुलाधर, तीर्थराम डंगोल व भिम्सेनदास श्रेष्ठं बेलुन ब्वयेकादिल ।
- नेवाः राज्य दुनेया भाषिक, संस्कृतिक, शैक्षिक, समावेशी, गौर नेवाः व अल्पसंख्यकतय् नीति गज्याःगु जुइ धइगु बारे अवधारण पौ न्ह्यब्वल ।
- ज्याझ्वःयात एनेकपा (माओवादी)या उपाध्यक्ष नारायणकाजी श्रेष्ठ 'प्रकाश', नेपाली कांग्रेसया केन्द्रीय दुजः तीर्थराम डंगोल, नेकपा (एमाले)या उपत्यका इन्चार्ज राजेन्द्र श्रेष्ठ, नेवा: राष्ट्रिय पार्टीया नाय: डा. केशवमान शाक्य, नेवाः जागरण मञ्चया अध्यक्ष सुजिव ब्रर्जाचार्य, जनजाति महासंघया अध्यक्ष पासांङ शेर्पा पाखें सम्बोधन ।
- भिम्सेनदास प्रधान नं सुभाय् देछानाः ।
- ज्याझ्वः नेवाः देय् दबूया संरक्षक मल्ल के सुन्दर व देय् दबूया छयाँजे रजनी मिला पाखें ज्याझ्वः संचालन ।