र्याली रंगशाला थ्यनीगु क्रम जारी, थीथी थासं र्याली
नेवाः स्वायत्त राज्य घोषणासभाय् ब्वति कायेत थीथी थासं पिहांवःगु र्याली त्रिपुरेश्वरया दशरथ रंगशालाय् थ्यनीगु क्रम जारी जुयाच्वंगु दु । आः तकया दुने अन न्यय्द्वलं मल्याक मनूत थ्यने धुंकूगु खँ ग्वसाः खलकं धाःगु दु । रंगशालाया प्यारेफिटय् स्वीद्वं जक च्वनीगु थाय् जुसां अनं आः हे न्यय्द्वं मुने धुंकूगु व अझ नं अनः मनूत वयेगु ज्या जुयाच्वंगुलिं क्वये फिल्डय् व रनिङ ट्रायाकय् नं व्यवस्थित यानाः तयेगु व्यवस्था जूगु खँ ग्वसाः खलकं धाःगु दु ।
थ्व स्वयां न्ह्य: नेवाः स्वायत्त राज्य घोषणा ज्याझ्वलय् ब्वति कायेत स्वनिगः व स्वनिगः पिनेया थीथी थासं र्याली पिहांव:गु ख: ।
नेवाःतय् राष्ट्रिय संगठन नेवा: देय् दबूया ग्वासाःलय् येँया बसन्तुली पाखें छगू र्याली पिहांव:गु दु । अन येँया थीथी थासं पिहांवःगु चीची धंगु जुलुलत मुना: छगू त:जिगू र्याली पिहां व:गु ख: । नेवाः जागरण मञ्चं येँया निगू थासं पिकागु जुलुसं नं बसन्तुली मुनाः छगू बृहत र्याली सहित रंगाशाला थ्यंगु ख: ।
अथेहे ज्यापु महागुथिं अष्टमातृका लागा चाःहिलेगु ज्या जुयाच्वंगु दु । येँया च्यागू थासय् दुगु अजिमा: लागा चाःहिलाः उगु र्याली खुल्ला मञ्चय् मुना: रंगशाला व:गु ख:। महागुथिया छयाँजे राजभाइ जकःमिं नेवाःतय् निंतिं थौं छगू विशेष न्हि जूगुलिं नेवाःतय् अजियात सम्मान यासें च्यागू अजिमाः चाहिलाःगु कनादिल । वयेकलं थुगु र्यालीइ झिद्वं मनूत दुगु व ब्वति काःपिं दक्वसिया ल्हाती नेवाः ध्वाँय् दुगु कनादिल ।
अथेहे यलःया पुल्चो पाखें नं छगू तःजिगू र्याली येँ वयाच्वंगु दु । थन छखाः छेँ नं छम्ह मिजं व छम्ह मिसाः र्याली ब्वति कायेमाःगु इनाप कथं याक्व मनूतय्सं ब्वति का:गु ख: । अथेहे थिमि पाखें नीन्यागः बसय् च्वनाः दशरथ रंगशालाय् ब्वति कायेत मनूत व:गु ख: । अनं सांस्कृतिक झाँकी सहित येँ व:गु खः ।
स्वनिगः पिनेया धौख्य, भ्वाँत आदि लागां नं झिगः बसय् च्वनाः अनया स्थानिय नेवाःत घोषणा सभाय् ब्वति कायेत व:गु दु । अथेहे नेवाःतय् थीथी खलः पुच व स्वर्तस्पूर्त रुपं नेवाःत स्वनिगः दुनेया थीथी थासं जुलुस, पराम्परागत वसः व नेवाः ध्वाँय् सहित दशरथ रंगशालाय् ब्वति कायेत वयाच्वंगु दु ।
