न्हूगु संविधानया नां 'नेपाःया संविधान २०६७'

न्हूगु संविधानया प्रावधानतय् बारे राजनीतिक दलतय् दथुइ सहमति मजुइवं अन्ततः शुक्रवाः थुकीयात निर्वाचन मार्फत क्वःछीउगु दु । संवैधानिक समितिलय् न्हूगु संविधानया नां, राष्ट्रिय ध्वाँय्, राष्ट्रिय चिं, राज्या परिभाषा, संकटकालीन व्यवस्था आदिया बारे सहमति जुइमफुगु ख: ।

शुक्रवाः च्वंगु संवैधानिक समितिया बैठकय् थीथी विषय बारे निर्णय यायेत जूगु निर्वाचनं न्हूगु संविधानया नां 'नेपाःया संविधान २०६७' तयेगु प्रस्ताव स्वीकृत जूगु ख: । थुगु प्रस्तावया पक्षय् ३१ मत लाःगु खसाः विपक्षय् २२ मत व १ मत तटस्थ च्वंगु खः ।

'संक्रमणकालिन अवस्थाय् संवैधानिक अंग व न्यायधिसतय् स्वला:या दुने न्हू नियुक्ति'या प्रस्ताव अस्वीकृत जूगु दु । अथेहे संविधान संशोधनया निंतिं निश्चित संख्याया नागरिकतय्सं हस्ताक्षर याना: संशोधनया माग यायेफइगु प्रस्ताव स्वीकृत जूगु दु ।

माओवादी लगायत मधेशवादी दलतय्सं नेपाःया ध्वाँय् हिलेमाःगु धका: त:गु प्रस्ताव बूगु दुसाः राष्ट्रिय चिं मतयेगु प्रस्ताव बहुमतं पारित जूगु दु । नापं धर्मनिरपेक्षता बहुलवाद व मानव अधिकारयात संविधानया असंशोधनीय प्रावधान कथं तयेगु कांग्रेस व एमालेया प्रस्ताव ध्वनी मतं अस्वीकृत जूगु दु ।

थ्वहे दथुइ माओवादीं न्ह्याकूगु झिंदँ तकया सशस्त्र द्वन्दवयात 'जनयुद्ध' धयेगु प्रस्ताव नं अस्वीकार जूगु दु । थुगु प्रस्तावया पक्षय् २० मत व विपक्षय् ३० मत लाःगु खः ।

मधेशवादी दलतय् प्रस्ताव कथं 'मधेश आन्दोलन' धाःसाः बहुमतं पारित जूगु दु । मधेश आन्दोलन च्वयेगु पक्षय् २९ मत व विपक्षय् २१ वःगु खः ।

अथेहे संविधानय प्रस्तावनाय् तयेगु निंतिं थीथी पक्षं प्रस्ताव याःगु 'आदिवासी जनजाति आन्दोलन', 'थरुहट आन्दोलन', 'घाइते बेपत्ता योद्धाया स्मरण' खँग्वतय् प्रस्ताव ध्वनी मतं अस्वीकृत जूगु दु । नापं 'वीरविरंगना' खँग्वःया पलेसाः 'नेपाली जनताया त्याग व बलिदान' खँग्वः पारित जूगु दु । संविधानया प्रस्तावनाय् तयेगु कथं 'शान्ति व मानव अधिकार' खँग्वःत मतेयेगु प्रस्ताव नं अस्वीकृत जूगु दु ।

संविधानया प्रस्तावय् 'जातीय जनसंख्याया आधारय् पूर्ण समानुपातिक समावेशी' धका: तयेमाःगु प्रस्ताव अस्वीकार जूगु दु । उकीया पलेसाः 'समानुपातिक समावेशी' पारित जूगु दु । अथेहे 'जनता'या खँग्वः तयेगु प्रस्ताव बहुमतं पारित याःगु दुसाः 'बहुलवाद' अस्वीकृत जूगु दु ।

संवैधानिक समितिया निर्वाचनय् बहुमतं पारित जूगु प्रस्तावत प्रतिवेदनय् दुथ्याकीगु जूगु दुसाः मेगू फरक मतया कथं दुथ्याकीथु व्यवस्था नं दु ।