नेतातय्सं क्रिसमसया भिंतुना
इसाई धर्मवलम्बीतय् महान् नख: क्रिसमस थौं हनिमय् नापं नेपालय् नं थीथी ज्याझ्व: याना न्याकूगु दु । जनआन्दोलन २०६२/६३ लिपा: पुनस्थापित प्रतिनिधिसभां नेपा:यात धर्मनिरीपेक्ष राज्य घोषणा लिपा: थुगु न्हि कुन्हु सरकारं सार्वजनिक बिदा बी शुरु या:गु ख: ।
थ्वहे दथुइ राष्ट्रपति, प्रधानमन्त्री, एमाले अध्यक्ष लगायतं क्रिसमसया लसताय् भिंतुना देछानादीगु दु ।
राष्ट्रपति डा. रामवरण यादवं इसाई धर्मावलम्बीतय् महान् नख: क्रिसमसया लसताय् देय् दुने व देय् पिनेया दक्वं क्रिश्चियन धर्मावलम्बीतय्त सुख, शान्ति व समृद्धिया कामना यानादीगु दु । वयेकलं थुगु नख: पाखें नेपाली जनताय् आपसी मेलमिलाप, सद्भाव व भाइचाराया भावना जागृत याना: शान्त, समुन्नत व समृद्ध नेपा: निर्माण यायेत झी सकसितं प्रेरणा प्राप्त जुइमा: धका: कामना यानादीगु दु ।
प्रधानमन्त्री माधवकुमार नेपालं क्रिसमसया लसताय् भितुना सन्देश बियादिसें थुगु पर्वं दक्वं इसाई धर्मावलम्बीतय्त सुख, शान्ति व समृद्धिया भिंतुना बियादिल । वयेकलं शान्त, समुन्नत व समृद्ध नेपा: दयेकेत थुगु नख: प्रेरणा जुइमा: धयादीगु दु ।
अथेहे नेकपा (एमाले)या अध्यक्ष झलनाथ खनालं नं नेपाली इसाई धर्मावलम्बीतय्सं न्यायेकीगु क्रिसमस पर्व व न्हू दँ इस्वी सम्बत् २०१०या लसताय् भिंतुना बियादीगु दु । वयेकलं विश्व बन्धुत्व, शान्ति व मानवताया निंतिं भिंतुना बियादिसें न्हूगु संविधान निर्माणया ज्या सफलतापूर्वक सम्पन्न यायेफ्येमा: धका: कामना यानादीगु दु ।
