राप्रपा नेतायात गोलीं क्येकाः स्यात

बुटवलया मैनाबगरय् शुक्रवाः सनिलय् राप्रपाया जिल्लास्तरीय छम्ह नेतयात गोलीं क्येकाः स्याःगु दु । राप्रपा कपिलबस्तुया जिल्ला दुजः परवेज मुसलमानयात स्याःगु खः । मुसलमानयात छ्यँनय् स्वंगः गोली लाःगु खः ।

कपिलबस्तुया तौलिहवा पाखें गाडी देयेकेत बुटवलया मैनाबगर ग्यारेजय् थ्यंम्ह पीदँया मुसलमानयात शुक्रवाः सनिलय्या न्याताः ईलय् अज्ञात पुचलं गोलीं क्येकाः स्याःगु खँ बुटवल प्रहरीं धाःगु दु । घटनाया बिस्तृत जानकारी मवनीगु खं नं प्रहरीं धाःगु दु । प्रहरीं अनुसन्धानया निंतिं मुसलमानया जाहान नाजमा खातुनयात नियन्त्रणय् काःगु दु । अथेहे प्रहरीं घटनास्थलं भारती प्लेटया मोटरसाइकल नं बरामद याःगु खँ नं धा:गु दु ।