देय् सैनिकीकरणपाखे
येँ (सन्ध्या टाइम्स)/गम्भीर कथंया मावन अधिकार उल्लंघन याःम्ह धकाः द्वपं बियातःम्ह नापं छानविनया घेराय् लानाच्वंम्ह नेपाली सेनाया उपरथी तोरणबहादुर सिंहयात नेपाल सरकारं बढुवा यानाः रथी दयेकेगु धकाः याःगु निर्णय आः देय् सैनिकीकरणपाखे न्ह्याःवंगुया संकेत खः धकाः मानव अधिकारवादीतय्सं धाःगु दु ।
नेपाःया मानव अधिकारवादी आन्दोलनया प्रणेता मध्ये छम्ह नापं अन्तराष्ट्रिय कानूनविद् गोपाल शिवाकोटी चिन्तनं 'सन्ध्या टाइम्स'लिसे खँ ल्हासें सरकारया उगु निर्णयया विरोधय् फुक्क अधिकारकःमिपिं जानाः आन्दोलन यायेमाः धयादीगु दु। २०४६ सालया आन्दोलन लिपा दयेकूगु मल्लिक आयोगं दोषी ठहर याःपिं नापं २०६२-०६३ सालया आन्दोलन लिपा नीस्वंगु रायमाझी आयोगं दोषी ठहर याःपिं सुरक्षाकर्मीतय्त आः तकं कारवाही मयाःनिगु खँ न्ह्यथँसें वय्कलं आवंलि नेपाःया सेना व प्रहरीं न्ह्याथेंज्याःगु अपराध याःसां इमित कारवाही जुइ मुखु धइगु संकेत धकाः नं थुइकेमाः धयादिल ।
अथे हे मानव अधिकार तथा सामाजिक रुपान्तर अभियान नेपाःया नायः विष्णु पुकार श्रेष्ठं नं तोरण बहादुर सिंहयात बढुवा याःगु धइगु तसकं गम्भिर विषय खः धयादिल ।
