नेपाल संवत् बारे नं मतदान
येँ (सन्ध्या टाइम्स)/ संविधानसभाया दकलय् महत्वपूर्णगु समिति कथं नालातःगु संवैधानिक समितिइ नेपाल संवत् छ्यलेगु कि मछ्यलेगु धइगु खँयात कयाः नं मतदान याइगु जूगु दु। नेपाः राष्ट्रिय पार्टीं न्हूगु संविधानया नां 'नेपालको संविधान-११३०' तयेमाः धकाः तःगु प्रस्तावयात कयाः अन मतदान जुइत्यंगु खः। नेपाः पार्टीया प्रस्तावय् मतैक्य मजुइवं मेमेगु बुँदाय् थें उगु बुँदाय् नं मतदान यायेगु सहमति जूगु खः ।
उगु समितिइ सहमति जुइ मफुगु फुक्क विषयय् थौं ल्हाः ल्ह्वनाः मतदान याइगु ग्वसाः दु। विवाद जूगु विषययात कयाः माओवादी, कांग्रेस व एमालेया शीर्ष नेतातय्गु दथुइ छुं दिं न्ह्यः जक मुँज्या च्वनाः म्हिगः विहिवाः तकया दुने क्वःछी मफुगु विषयय् थौं शुक्रवाः चुनाव यानाः खँ क्वःछीगु धकाः सहमति जूकथं थौं उगु चुनाव यायेत्यंगु खः ।
दलतय् दथुइ विवाद जुयाच्वंगु विषय संविधानया नां, संविधानया प्रस्तावना, नेपाःया राष्ट्रिय चिं, संकटकाल लागू यायेगु, संविधान संशोधन नापं थीथी कथंया विषययात कयाः उगु मतदान यायेत्यंगु खः। संवैधानिक समितिया ज्याकुथी थौं ४ बजेनिसें हे चुनाव जुइ धाःगु दु। संवैधानिक समितिइ मुक्कं ख्वीस्वम्ह सभासदपिं दुजः दुसा उकी एनेकपा (माओवादी)या जक झिंच्याम्ह दु। संविधानसभाय् दुथ्यानाच्वंगु फुक्क हे पार्टीया सभासदपिं थुकी दुथ्याः ।
