प्रमया लाइनय् प्रकाशमान ?
येँ (सन्ध्या टाइम्स)/नेपाःया राजनीति तसकं तरल जुयाच्वंगु अवस्थाय् आः जनवरी महिनाया दुने हे देसय् हिउपाः हयेगु निंतिं नेपाली कांग्रेस दुने गृहकार्य जुयाच्वंगु दु धकाः कांग्रेसया छम्ह नेतां धयादीगु दु ।
प्रधानमन्त्री माधव कुमार नेपाल कन्हय् चीन भ्रमणय् झाइगु अले चीन भ्रमणं लिहां वयेवं हे सरकारय् हिउपाः हयेगु निंतिं कांग्रेसया नेतातय्सं माःगु कथं गृहकार्य यानाः थीथी दलया नेतातलिसे सहलह ब्याकेगु यानाच्वंगु दु धकाः नं धाःगु दु।
थ्वहे झ्वलय् सर्वोच्च नेता गणेशमान सिंहया काय प्रकाशमान सिंह श्रेष्ठयात प्रधानमन्त्री दयेके फत धाःसा प्रमुख प्रतिपक्षी एनेकपा (माओवादी) नं माने जुइगु अवस्था ब्वलनी धकाः उगु कथं गृहकार्य यानाच्वंगु खँ सीदुगु दु। नेपाली कांग्रेस दुनेया स्वम्ह सभापतिपिं रामचन्द्र पौडेल, गोपालमान श्रेष्ठ सिबें प्रकाशमानयात प्रम यायेफत धाःसा आदिवासी जनजाति नं लय्ताइ धइगु तायेकाः थ्व कुतः जुयाच्वंगु खँ धाःगु दु ।
