माओवादी षड्यन्त्र विरुद्ध छप्पं जुइत प्रमय इनाप
प्रधानमन्त्री माधवकुमार नेपालं सत्ता कब्जा यायेगु व विदेशी प्रभुयात नेपाःया अन्तरिक मामिलाय् हस्तक्षेप यायेत इनाप यानाः राष्ट्रिय स्वाधिनता धरापय् लाकेत्यंगु माओवादी षड्यन्त्र विरुद्ध लगे जुइत नेपाःमितय् छप्पं जुइत इनाप यानादीगु दु ।
नेकपा (एमाले) दोलखाया न्हय्क्वःगु जिल्ला अधिवेशनया शुक्रवाः सदरमुकाम चरिकोटय् उल्लेज्या यानादिसें प्रधानमन्त्री नेपालं विदेशी प्रभुयातयात सःतुगु व सतकं सत्ता कब्जा यायेगु माओवादीया धम्की पाखें सुं मग्याइगु धयादिल । वयेकलं माओवादीयात राजनीतिक नियम पालना यायेत नं हाथ्या बियादिल ।
वयेकलं विदशीयात प्रभु खंकीपिं छुं राजनीतिक नेतातय् धापू राष्ट्रघाती जूगु नं द्वपं बियादिल । नेपाली जनता थःगु निर्णय थम्हं हे यायेत सक्षम दुगु धयादिसें वयेकलं माओवादी अध्यक्षं विदेशीयात हस्तेक्षप यायेत इनाप यानाच्वंगु द्वपं बियादिल ।
वयेकलं माओवादीं देय्न्यं न्ह्यानलाथें न्ववानाच्वंगु व माओवादी कार्यकर्तातय्सं विध्वंस ब्वलंकाच्वंगु धयादिसें नकरात्मक व विरोधी मानसिकता त्याग यानाः राजनीतिक संस्कार स्यनेत नं माओवादीयात इनाप यानादिल ।
प्रधानमन्त्रीं नेपालं माओवादी सेना समायोजन व ल्वाभः व्यवस्थापन मजुइकन मेगू दलतय्त चुनावय् मवनेत इनाप यानादिल । अथेहे वयेकलं माओवादी सेना समायोजन मजूतल्ले न्हूगु संविधान निर्माण नं जुइ मफइगु धयादिल ।
