माओवादी पाखें राष्ट्रिय स्वाधीनताया निंतिं प्रचारात्मक ज्याझ्वः
नागरिक सर्वोच्चताया निंतिं आन्दोलन यानाच्वंपिं एनेकपा (माओवादीं) शुक्रवाः निसें राष्ट्रिय स्वाधीनताया निंतिं प्रचारात्मक ज्याझ्वः न्ह्याकूगु दु ।
शुक्रवाः च्वंगु पार्टी पदाधिकारीतय् बैठक लिपाः माओवादी अध्यक्ष पुष्पकमल दाहाल 'प्रचण्डं' छगू विज्ञप्ति पिथनादिसें राष्ट्रिय स्वाधीनता बिना नागरिक सर्वोच्चता कायम जुइमफइगु धयादिसें थौं नं निसें राष्ट्रिय स्वाधीनताया निंतिं प्रचारात्मक ज्याझ्वः शुरु यानाःगु धयादिल । विज्ञप्तिइ सन् १९५० सहित असमान सन्धीत खारेज यायेत नं माग या:गु दु ।
विज्ञप्तिइ नागरिक सर्वोच्चता कायम यायेत व राष्ट्रिय स्वाधीनताया रक्षाया निंतिं राष्ट्रघती, दलाल, अपराधी व भ्रष्टाचारीतय् भण्डाफोर यायेगु खँ न्ह्यथंनातःगु दु । अथेहे सरकारं विदेशी योजना व निर्देशनय् षड्यन्त्र यानाच्वंसाः अनिश्चितकालीन बन्द तकया आन्दोलन घोषणा यायेत नं बाध्य जुइगु ख्याच्वः ब्यूगु दु ।
