बस्नेतयात अदालतय् उपस्थित याकी : आयोग
राष्ट्रिय मानव अधिकार आयोगं मैना सुनार हत्या काण्डय् आरोपित नेपाली सेनाया मेजर निरन्जन बस्नेतयात काभ्रे जिल्ला अदालतय् उपस्थित याकेत सरकारयात इनाप याःगु दु ।
आयोगं बिहीवाः प्रधानमन्त्री व मन्त्रिपरिषदया ज्याकूयात पौ छ्वयाः मानवअधिकार उल्लंघन सम्बन्धी गम्भीर प्रकृतिया मुद्दात नियमित अदालत बाहेक सैनिक अदालनया क्षेत्राधिकार दुने मलाइगु प्रष्ट याःगु दु ।
अथेहे उगु पौलय् काभ्रेपलान्चोक जिल्ला अदालतया पूर्वपक्षया निंतिं मैना सुनारया हत्याया वारेन्ट जारी यायेधुंकूगु अवस्थाय् द्वपं लानाच्वंम्ह मेजर बस्नेतया विषयलय् 'कोर्ट अफ इन्क्वायरी' गठन यानाः कारवाही प्रकृया न्ह्याकूगु प्रति आयोगया गम्भीर ध्यानाकर्षण जूगु खँ न्ह्यथंगु दु ।
नागरिक अदालतय् कारवाहीयुक्त अवस्थाय् दुम्ह मनूयात ज्वना लःल्हायेत व सम्बन्धित पक्षं वयात अदालतय् उपस्थित याये दयेमाःगु खँ नं पौलय् च्वयातःगु दु । अथेहे आयोगं याःगु सिफारिस व सर्वोच्च अदालतं या:गु सिफारिस बमोजिम कारवाही यायेत नं माग याःगु दु । आयोगं माओवादीं पाखें हत्या याम्ह कोटेश्वरया रामहरि शर्माया मुद्दा नं अदालत मार्फत हे न्ह्याकेत सरकारया ध्यानाकर्षण याकूगु दु ।
