माओवादी शिविरया विस्फोटक पदार्थ नष्ट
संयुक्त राष्ट्रसंघीय माईन एक्सन पुचः (अन्म्याटं) विहीवाः माओवादी सेनाया न्हय्गुलिं शिविरय् भण्डारण यानातःगु विष्फोटक पदार्थ नष्ट याःगु दु । सरकार व माओवादी दथुइ जूगु विस्तृत शान्ति सम्झौताय् न्ह्थंनातः कथं अन्म्याटं माओवादी सेनाया शिविरय् दुगु खतराजन्य विष्फोटक पदार्थ नष्ट याःगु खः ।
लिप्पांगु पटक अन्म्याटं सुर्खेत जिल्लाया दशरथपुरस्थित माओवादी सेनाया खुगूगु शिविरय् दुगु ६५ प्रकारया बिष्फोटक पदार्थ नष्ट या:गु ख: । विस्तृत शान्ति सम्झौता लिपा अन्म्याटं माओवादीया दक्वं मुख्य शिविरय् भण्डारण यानात:गु बिष्फोटक पदार्थयात निगू कथंया प्राथामिकताय् तया: नष्ट यायेगु ज्या न्ह्याकूगु ख: ।
प्राथामिकता कथं २००७या अप्रिल निसें २००८या जुलाइया दथुइ राष्ट्रसंघ पाखें करार प्राप्त आर्मर पुचलं घरेलु बिष्फोटक पदार्थ, डेटोनेटर लगायतया बिष्फोटक पदार्थ दुगु युद्ध सामाग्री व कच्चा पदार्थ याना: १८६४२ थान बिष्फोटक पदार्थ नष्ट या:गु ख: ।
अथेहे निगूगु प्राथामिकताय् ला:गु भण्डारण यायेमज्यूगु बिष्फोटक पदार्थ नष्ट या:गु ख: । सन् २००९या जुननिसें आ: तक उगु पुचलं माओवादी सेनाया न्हय्गुलिं शिविरय् दुगु २८२७३ थान खतराजन्य बिष्फोटक पदार्थत नष्ट या:गु दु ।
अथेहे नेपाली सेनां आ: तक ५३ माइन तयात:गु थाय् मध्ये १५ थाय् सफा यायेधुंकूगु व २७५ घरेलु बिष्फोटक पदार्थ तयात:गु थाय् मध्ये १०५ थाय् सफा यायेधुंकूगु जानकारी ब्यूगु दु ।
