नेवाः स्वायत्त राज्य घोषणायात व्यापक तयारी
साहित्यकारलिसे सहलह
येँ (सन्ध्या टाइम्स)/नेवाः स्वायत्त राज्य घोषणाया निंतिं नेवाः साहित्यकारतनाप सहलह ज्याझ्वः जुल। नेवाः स्वायत्त राज्य मंकाः संघर्ष समितिया ग्वसालय् न्ह्याकूगु उगु ज्याझ्वलय् नेवाः साहित्य ख्यःया आपालं साहित्यकारत थ्यंगु खः। ज्याझ्वलय् मंकाः संघर्ष समितिया दुजः मल्ल के. सुन्दरं पुस ११ गते जुइगु ज्याझ्वः बारे जानकारी यानादीगु खः ।
पुस ११ कुन्हु दक्व नेवाःत ११ बजे दशरथ रंगशालाय् थ्यंकाः नेवाः राष्ट्रिय म्येँ हायेकाः नेवाः ध्वाँय् ब्वयेकी। नेवाः राज्य घोषणायात सुभाय् बीत थीथी आदिवासी जनजातित उपस्थित जुइ। वकुन्हुया ज्याझ्वः थीथी टेलिभिजन व एफ.एम.तय्सं प्रत्यक्ष प्रशारण याइगु जुयाच्वंगु दु। वकुन्हु नासः सृष्टी कलापाखें सांस्कृतिक ब्वज्या जुइ ।
थ्वहे झ्वलय् घोषणासभा बारे जानकारी बीगु ताः तयाः थौं ग्वसाः खलकं छगू पत्रकार सम्मेलन यायेत्यंगु दु। २ बजे क्षेत्रपाटी पार्टी प्यालेसय् उगु पत्रकार सम्मेलन जुइ ।
२ लाख ५७ द्वः तका ग्वाहालि
येँ (सन्ध्या टाइम्स)/नेवाः स्वायत्त राज्य घोषणाया लागिं नेवाः स्वायत्त राज्य मंकाः संघर्ष समितियात नेवाः जागरण व्यापारी मञ्च व मेपिं व्यापारीतपाखें यानाः २,५७,००० तका दां लःल्हाःगु दु। म्हिगः छगू ज्याझ्वलय् व्यापारी मञ्चया नायः राजेन्द्र प्रसाद श्रेष्ठं नेवाः स्वायत्त राज्य घोषणासभाया आर्थिक कजि वीरेन्द्रभक्त श्रेष्ठयात लःल्हानादीगु खः ।
ज्याझ्वलय् ग्वाहालिकथं नेवाः जागरण मञ्चपाखें छगू लाख तका, मञ्चया सल्लाहकार रमेश महर्जनपाखे ५१ द्वः तका, मेम्ह सल्लाहकार मेघबहादुर श्रेष्ठपाखें २६ द्वः तका, क्षेत्रपाटी पार्टी प्यालेसपाखें १५ द्वः तका, मञ्चया दुजः कृष्णज्योति शाक्यपाखें १० द्वः, ईश्वर डंगोलपाखें ५ द्वः मुंगु खः। उगु हे ज्याझ्वलय् सुनचाँदी व्यवसायी संघया नायः तेजरत्न शाक्यपाखें सुनचाँदी व्यवसायी (स्वनिगः दुने) पाखें ५० द्वः तका नं लःल्हाःगु खः ।
नेवाः राज्य घोषणाया थ्व छगू ज्याझ्वलय् करिब २० लाख तका खर्च जुइगु अनुमान यानातःगु दु। ज्याझ्वलय् मू पाहां कथं झाःम्ह मल्ल के. सुन्दरं नेवाः स्वायत्त राज्य बारे कनादीगु खः ।
