ख्वपय् नेपाल लोकतान्त्रिक नेवाः संघया सक्रियता

ख्वप (सन्ध्या टाइम्स)/ने.सं. ११३० पोहेलाथ्व नवमि (पुस ११ गते) शनिवाः कुन्हु जुइगु नेवाः स्वायत्त राज्य घोषणा सभाया प्रचार प्रसार व ज्याझ्वः ताःलाकेत नेपाल लोकतान्त्रिक नेवाः संघ ख्वप जिल्ला लागाया मुँज्या च्वन। नेपाल लोकतान्त्रिक नेवाः संघ ख्वप लागाया नायः प्रदिप शाक्यया सभापतित्वय् च्वंगु उगु मुँज्याय् नेकपा (एमाले) ख्वप जिल्लाया सचिव सोम मिश्रं अग्राधिकार व स्वायत्त राज्यया विषयय् मेमेगु पार्टी स्वयां एमाले छपलाः न्ह्यःने लाःगु व बिस्क कथं स्पष्ट दृष्टिकोण दु धासें उगु नेवाः स्वायत्त राज्य घोषणा सभा व जुलुसय् एमालेया कार्यकर्ता व थः स्वयमं नं ब्वति कायेगु खँ कनादिल ।

जातीय स्वशासनया पक्षपाती, नेपाल लोकतान्त्रिक नेवाः संघया इन्चार्ज त्रिरत्न शाक्यं जाति, भाषा, साहित्य, संस्कृति, भौगोलिक व प्राकृतिक स्रोत साधनया आधार कथं प्रादेशिक सीमांकन यायेमाःगु दु धासें नेवाः स्वशासन केन्द्र शासित राजधानी प्रदेशया अवारणा नेकपा (एमाले)यात स्वीकार जुइ मखु धयादिल ।

नेपाल लोकतान्त्रिक नेवाः संघया केन्द्रीय न्वकु हरिकृष्ण व्यञ्जनकारं विराट नेपालभाषा साहित्य सम्मेलन गुथिं पिथनाच्वंगु ख्वाःपौ 'ह्याउँबाला' व ने.सं ११३० या नगुमा (क्यालेण्डर) स पिदंगु नेवाः प्रदेश नेपालमण्डलया प्रस्ताविक लागा अति वैज्ञानिक व पाय्छि जू धकाः थीथी दलया प्रतिनिधितय्सं नं सहमति प्वंकूगु खँ कनादिल ।

ज्याझ्वलय् नेपाल लोकतान्त्रिक नेवाः संघया मूछ्यांज्ये व नेवाः स्वायत्त राज्य मंकाः संघर्ष समितिया केन्द्रीय दुजः कृष्णवहादुर घजु, नेवाः स्वायत्त राज्य मंकाः संघर्ष समिति ख्वप लागाया कजि हिरण्यप्रताप सांगामीपिंसं पोहेलाथ्व नवमिया ज्याझ्वः ताःलाकेत सकसिनं ब्वति कयादीत इनाप यासें नेवाः स्वायत्त राज्यया ध्वाँय् व इनाप पर्चा ख्वपय् इना नं दिल ।