११ गतेया लागिं ज्यापु महागुथि उत्साहित

येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया ग्वसालय् पौष ११ गते जुइगु नेवाः स्वायत्त राज्य घोषणा सभाय् ज्यापुतय् तःजिक सहभागिता दयेकेत ज्यापु महागुथिं येँ देय्या परम्परागत त्वाःखलःत नाप सहलह मुँज्या जुल। ज्यापु महागुथि येँ महानगर समितिया नायः मोहनकृष्ण डंगोलया सभापतित्वय् जूगु उगु ज्याझ्वलय् ज्यापु महागुथिया केन्द्रीय नायः दिपेन्द्र महर्जन, सभासद तिर्थराम डंगोल, नेवाः देय् दबूया संरक्षक मल्ल के. सुन्दर, र्‍याली व्यवस्थापन समितिया संयोजक राजभाइ जकःमि, नेवाः स्वायत्त राज्य मंकाः संघर्ष समितिया दुजः मंगल सिंह पाहां कथं झाःगु खः ।

मचाराजा महर्जनं ज्याझ्वःयात लसकुस यासें परम्परागत त्वाःया गुरु, कजि व त्वाःया प्रतिनिधिपिंसं नं ज्याझ्वलय् ब्वति काःगु दु। ज्यापु महागुथि येँ महानगरया नायः व उगु ज्याझ्वःया सभापति मोहनकृष्ण डंगोलं वइगु पुस ११ गतेया ज्याझ्वः ताःलाकेत दक्वसित इनाप यानादिल। नापं ज्यापु महागुथिया अवधारणा राजनैतिक मखु धकाः नं कनादिल।
ज्यापु महागुथिया केन्द्रीय नायः विपिन्द्र महर्जनं अधिकार धइगु अथें वइ मखु, थुकिया निंतिं सरकारयात दबाब बीमाःगु बिचाः प्वंकादिल। वय्कलं धयादिल, 'नेवाः स्वायत्त राज्यया अधिकार संविधानय् दुथ्याकेत संविधानसभायात नं दबाब बीमाः ।'

सभासद् तीर्थराम डंगोलं एकात्मक व संघात्मक राज्यया बारे विवेचना यानादिसें पुस ११ गते जुइगु ज्याझ्वलय् नेवाः म्हसीका न्ह्यब्वयेत इनाप यानादिल ।

नेवाः देय् दबूया संरक्षक मल्ल के. सुन्दरं थज्याःगु ज्याझ्वः मेमेगु खलः पुचलं नं यानाच्वंगु दु धासें थुगु घोषणायात ताःलाकेत झी सकलें नेवाःत छप्पँ छधी जुयाः न्ह्याः वनेमाःगु खँ ध्वाथुइकादिल ।

ज्यापु महागुथिया र्‍याली व्यवस्थापन समितिया संयोजक राजभाइ जकःमिं नेवाः राष्ट्रिय म्येँया छझ्वः न्यंकादिसें पुस ११ गतेया ज्याझ्वलय् स्वनिगः जक मखु पिने जिल्लाया ज्यापु दुजःतय्गु नं सहभागिता दइगु खँ कनादिल ।

नेवाः स्वायत्त राज्य मंकाः संघर्ष समितिइ ज्यापु महागुथिपाखें प्रतिनिधित्व यानादीम्ह मंगलकृष्ण सिंहं स्वायत्तताया आवश्यकता व संघर्ष समितिं यानाच्वंगु ज्याखँ बारे अन कनादिल। उगु दिंया ज्याझ्वः ताःलाकेत राजनीतिक पार्टीनाप सहलह जुयाच्वंगु खँ नं वय्कलं कनादिल। ज्याझ्वलय् नेवाः स्वायत्त राज्य व उकिया आवश्यकता बारे सत्यनारायण डंगोल, सर्वोत्तम डंगोल, राजभाइ ज्यापुं न नुगःखँ प्वंकादीगु खः ।

पुष ११ गतेया ज्याझ्वः ताःलाकेत येँया दक्वं परम्परागत ज्यापु त्वालं थःगु सक्रिय सहभागिता जुइगु बचं बिसें ज्याझ्वः क्वचायेकूगु खः ।