माओवादी मजदूरं यानाः मेपिंत मछिं

येँ (सन्ध्या टाइम्स)/ माओवादी मजदूर संगठनया कारणं थःपिनि तलब अप्वःगु खःसां उमिसं यानाच्वंगु ज्यां थीथी उद्योगय् न्हापांनिसें ज्या यानाच्वंपिं मेपिं मजदूरत धाःसा असन्तुष्ट जुयाच्वंगु दु। माओवादी खुल्ला राजनीतिइ वयेधुंकाः स्वक्वः तक आन्दोलन यानाः मजदूरतय् तलब स्वद्वः व न्यासः तका बढे जुइधुंकूगु दु। तर तलब अप्वयावं थें माओवादी मजदूरतय्सं थौंकन्हय् ज्या यायेगु धाःसा म्हो याना हःगुलिं पुलांपिं मजदूरत असन्तुष्ट जुयावःगु खः ।

नां कने मयःम्ह छम्ह होटेल मजदूरं 'सन्ध्या टाइम्स'यात धयादिल, 'थौंकन्हय् माओवादी मजदूरया कारणं गुलिखे ज्या जुयाच्वंगु मदु। गुकिया लिच्वः व्यवस्थापनय् लानाच्वंगु दु।' थौंकन्हय् माओवादी मजदूरतय्सं व्यवस्थापनं ब्वःगु ज्या तकं मयाइगु खँ नं उम्ह मजदूरं कनादिल। यदि व्यवस्थापनं ज्या ब्वल धाःसा हाकिमयात हे ख्याच्वः बीगु ज्या माओवादी मजदूरतय्सं यानाच्वंगु दु। माओवादीया कारणं हे मजदूरतय् सुविधा अप्वःगु खःसां उमिगु हे कारणं ज्या धाःसा मजुयाच्वंगुलिं मेपिं इमान्दार मजदूरत सन्तुष्ट जुयाच्वंगु मदु ।

उम्ह होटल मजदूरं धयादी, 'तलब अप्वया वं थें ज्या नं उगु हे कथं यात धाःसा व्यवस्थापनयात नं ग्वाहालि जुइ। मजदूर व व्यवस्थापन दथुइ स्वापू नं बांलाइ।'
तर माओवादी मजदूरतय्सं थौंकन्हय् यानाच्वंगु ज्यां धाःसा थःपिंत तकं मछिनाच्वंगु खँ नं वय्कलं कनादिल। थःपिनि तलब अप्वया वं थें कम्पनीयात नं घाटा मजुइगु ज्या यायेमाः धासें कम्पनी हे ताथ जुइ कथं तलब जक अप्वयेकाः मजदूरतय्सं ज्या मयायेगु खःसा अज्याःगु कम्पनी गुगुं नं इलय् डुबे जुइ फइगु बिचाः नं वय्कलं कनादिल ।