म्हिगः नं नेप्से थहां वन
येँ (सन्ध्या टाइम्स)/नेपाल स्टक एक्सचेन्जय् वंगु मंगलवाः थहां वंगु नेप्से परिसुचक लगातार निन्हुया न्हि कुन्हु नं थहां वंगु दु। छन्हु न्ह्यःया शेयर कारोबारं ५ अंकं थहां वंगु नेप्से म्हिगः धाःसा तुलनात्मक रुपं छन्हु न्ह्यःया कारोबारं थें नेप्से थहां वन मफुत। वंगु वालं निसें थुगु वाःया न्हापांगु निन्हुया न्हि तक कुहां वःगु नेप्से वंगु मंगलवाः निसें हाकनं थहां वःगु खः। नेपाल स्टक एक्सचेन्जया कथं प्राइम कमर्सियल बैंकया तःधंगु परिमाणय् शेयर कारोबार जुयाच्वंगु कारणं नेप्सेय् थुकिया प्रभाव लानाः छुं भचा सुधार जुया वयाच्वंगु खः ।
प्राइमया तःधंगु परिमाणय् जुयाच्वंगु शेयर कारोबारं नेप्से १ दशमलव ७१ अंकं थहां वनाः ५४३ दशमलव ५७ अंकय् थ्यंगु दु। सेन्सेटिभ नं १ दशमलव २८ अंकं थहां वनाः १३४ दशमलव ३२ अंकय् थ्यंगु दु। फ्लोट शुन्य दशमलव ३७ अंकं थहां वन ।
नेप्से दकलय् अप्वः प्रभाव लाकीगु वाणिज्य समुह ५ दशमलव ८ अंकं थहां वनाः ५२१ दशलमव ५३ अंकय् थ्यंगु दु। विकास बैंक समुह शुन्य दशमलव ८४ या समान्य अंकं थहां वनाः ५९६ दशमलव ४४ अंकय् थ्यन। फाइनान्स समुह १ दशमलव १९ अंकं थहां वनाः ५६४ दशमलव १६ अंकय् थ्यंगु दु ।
उखे छन्हु न्ह्यःया कारोबारय् नं कुहां वःगु जलविद्युत समुह म्हिगः नं ४ दशमलव ८४ अंकं कुहां वयाः ७८३ दशमलव ३ अंकय् थ्यंगु दु। छन्हु न्ह्यः दकलय् अप्वः थहां वंगु अन्य समुहया उपसुचक कारोबार जूगु समुह मध्ये दकलय् अप्वः १० दशमलव ५७ अंकं कुहां वःगु दु। मेखे वीमा समुहपाखें छगू नं कित्ता शेयर कारोबार मजुल ।
राजनीतिक अस्थिरताया कारणं सुचक व दांया कारोबार थहां वये मफयाच्वंगु खःसा संसद सुचारु यायेगु माओवादीया घोषणा लिसें दांया कारोबार नं थहां वंगु दु। थ्व कुन्हु नेप्सेय् न्यय्प्यंगू कम्पनीया छगू लख व नीच्याद्वः व सछि व स्वीखुगू कित्ता शेयर न्याय-मी जुयाः ४यागू करोड ग्वीगू लख व ग्वीछद्वः तका दांया कारोबार जूगु दु। छन्हु न्ह्यःया शेयर कारोबारय् न्हय्गुद्वः व खुसः व नीन्यागू कित्ता शेयर न्याये-मी जुयाः प्यंगू करोड झिंनिगू लाख ख्वीनिद्वः तका दांया कारोबार जूगु खः ।
शेयर कारोबार जूगु कम्पनी मध्ये नीगुंगू कम्पनीया शेयर भाः थहां वंगु व झिंन्हय्गू कम्पनीया शेयर भाः कुहां वंगु दुसा च्यागू कम्पनीया शेयर भाः यथावत जुल। दकलय् अप्वः ८७३ क्वः तक कारोबार जुयाः ५८,७३० कित्ता शेयर न्याये-मी जूगु प्राइम कमर्सियल बैंकं स्वंगू करोड ख्वीगुंगू लख स्वीछद्वः तका दांया कारोबार याःगु दु।म्हिगःया कारोबारय् विराटलक्ष्मी विकास बैकं दकलय् अप्वः कमे याःगु दु। उखे पशुपति डेभलपमेण्ट बैंकं धाःसा द्यापं फःगु दु ।
