कांग्रेसयात शत्रु धाःगु माओवादीया अहंकार : पौडेल

सहमति व सहकार्य यानाः वने : खनाल
मधेशया मुद्दाय् गम्भीर जू : यादव

नेपाली कांग्रेसया संसदीय दलया नेता रामचन्द्र पौडेलं थःगु दलयात माओवादीं प्रधान शत्रु धाःगु माओवादीया अहंकार जूगु टिप्पणी यानादीगु दु ।

संसदया बैठकयात बिहीवाः सम्बोधन यानादिसें वयेकलं जुजु मदेवं माओवादीं कांग्रेसयात न्हापांगु शत्रुया घोषणा याःगु धयादिसें थनं हे विश्वासया संकट खनेदुगु धयादिल । वयेकलं माओवादीयात सुयातं शत्रुया मिखां मस्वयेत नं इनाप यानादिल ।

कांग्रेस उपसभापति नं जुयादीम्ह पौडेलं ल्वाभःया राजनीतिं सुयातं फाइदा मयाइगु धयादिसें दक्वं राजनीतिक दलतय्गु समान हैसियतया निंतिं दक्वं पार्टी निशस्त्र जुइमाःगु खँय् बः बियादिल । वयेकलं ल्वाभःया राजनीतिक तत्काल अन्त्य यायेमाःगु माग नं यानादिल ।

वयेकलं प्रजातन्त्रया स्थायित्वया निंतिं राष्ट्रिय सेनायात राजनीति स्वयां पिने तयेमाःगु धयादिल । वयेकलं सेनाय् राजनीतिकरण याःसाः थुकीं दक्वसितं समस्या जुइगु नं धयादिल । माओवादी सरकारं तत्कालिन प्रधानसेनापतियात कारवाही यानाः द्वंकूगु धयादिल ।

अथेहे संसदय् न्ववानादिसें नेकपा (एमाले)या अध्यक्ष झलनाथ खनालं सहमति व सहकार्य यानाः वंसा: ईलय् हे संविधान निर्माण याये फइगु धयादिल । वयेकलं २०४७या संविधान खुलाःया दुने च्वःगु धयादिसें उबलेया दसू कयाः आः न्ह्याः वनेमाःगु खँय् बः बियादिल ।

खनालं शान्ति प्रकृया व संविधान निर्माणया निंतिं समयसीमा क्वःछिना न्ह्याः वनेत राजनीतिक दलत नाप प्रस्ताव नं यानादिल । वयेकलं शीर्ष नेतातय् बैठकय् आः तक न्हूगु संविधान गुकथंया च्वयेगु धइगु बारे सहलह मजूगु धयादिसें उखे पाखे गम्भीर जुइत नं दक्वसित इनाप यानादिल ।

वयेकलं नागरिक सर्वोच्चताया पाय्छिगु अर्थ बलपूर्वक याइगु ज्याया मुक्ति जूगु धयादिल । वयेकलं बलपूर्वक गुवलय् तक राजनीति जुइ, छगू राजनीतिक दलनाप सेना व मेगु दक्वं निशस्त्र जुइ उगु ईलय् तक नागरिक सर्वोच्चताया नारां छुं मजुइगु धयादिल ।

अथेहे मधेशी जनअधिकार फोरमा अध्यक्ष उपेन्द्र यादवं दलतय्सं समावेशीया नारा जक ल्ह्वंगु तर अझ नं महेन्द्रया राष्ट्रवादी सिद्धान्त नालाच्वंगु द्वपं बियादिल । वयेकलं दक्वं ख्यलय् समावेशी मजुइकं समावेशीया मुद्दा पूमवनीगु नं धयादिल ।

हिन्दी भाषां न्ववानादीम्ह यादवं सर्वोच्च अदालतं हिन्दी भासं सपथ काःगुलिं उपराष्ट्रपति परमानन्द झायात निष्कृय यायेत ब्यूगु आदेशं संविधानसभाया हे बेइजत जूगु धयादिल । वयेकलं प्रमुख राजनीतिक दलतय् कारणं हे वर्तमान समस्या वःगु धयादिसें दक्वसितं मधेशया मुद्दाय् गम्भीर जुइत इनाप यानादिल ।