प्रचण्डं भारतीय धारणा बारे सरकारनाप स्पष्टिकरण माग
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' भारतीय प्रधानसेनापति दीपक कपुरं माओवादी लडाकूयात नेपाली सेनाय् समायोजन यायेमज्यूगु धाःगु अभिव्यक्ति बारे सरकारं थ:गु धारणा स्पष्ट यायेमाःगु माग यानादीगु दु ।
माओवादीं व्यवस्थापिका संसद चले यायेबीगु निर्णय लिपा न्हापांगु पटक च्वंगु बैठकय् न्ववानादिसें वयेकलं छम्ह विदेशी सेनापतिं सार्वजनिक समारोहलय् सेना समायोजन विरुद्ध न्ववाःगु लज्जाया विषय जूगुलिं सरकारया स्पष्ट धारणा माग याना:गु धयादिल ।
शान्ति प्रकृया विरुद्ध भारतीय सेनापति पाखें माओवादीनाप ल्वायेत नेपाली सेनायात ल्ह्वनेगु ज्या यानाच्वंगु नं वयेकलं धयादिल । वयेकलं नागरिक सर्वोच्चता व राष्ट्रिय स्वाधिनता नाप सम्बन्धित थुगु विषय बारे सरकारया स्पष्ट घारणा मवसाः आन्दोलन यायेगु ख्याच्वः बियादिल ।
माओवादी अध्यक्ष प्रचण्डं राष्ट्रपतिं पुलांम्ह प्रधानसेनापतियात थमौति बीत ल्ह्वंगु पलाः संघीय लोकतान्त्रिक गणतन्त्रया विरुद्धया षड्यन्त्र जूगु धयादिल । वयेकलं थः प्रधानमन्त्री जूगु ईलय् न्यालाःया दुने शान्ति प्रकृया व संविधान निर्माण क्व:चायेकेगु कार्यतालिका दयेकाःगु तर तत्कालीन सेनापतिं उकीया विरोधय् सार्वजनिक अभिव्यक्ति ब्यूगु व उकीया विरुद्ध वंगुलिं कारवाही यानाःगु धयादिल ।
अथेहे वयेकलं वर्तमान ईलय् नेपालय् निगू कथंया लोकतन्त्र दुगु न्ह्यथंनादिसें आः वास्ताविक लोकतन्त्रया मजाक जुयाच्वंगु न्ह्यथंनादिल । वयेकलं माओवादीयात याकचाः यानाः मेगू दल न्ह्याः वंसाः उकीं बांलागु लिच्वः महइगु ख्याच्वः बियादिल ।
वयेकलं माओवादीं सत्ता कब्जा यायेगु हल्ला ब्वलंकाः राष्ट्रपतियात माओवादी विरुद्ध पलाः ल्ह्वनेत इनाप यागुलिं हे सहज राजनीतिक प्रकृया अवरुद्ध जूगु धयादिल । वयेकलं सम्बोधनया झ्वलय् माओवादी शान्ति प्रकृयाय् प्रतिबद्ध जूगु धयदिसें थुकी शंका मयायेत नं इनाप यानादिल ।
